সূক্ত 34

34.1

৫ শুনহোত্রো ভারদ্বাজঃ । ইন্দ্রঃ । ত্রিষ্টুপ্ ।

সং চ ত্বে জগ্মুর্গির ইন্দ্র পূর্বীর্বি চ ত্বদ্যন্তি বিভ্বো মনীষাঃ ।
পুরা নূনং চ স্তুতয় ঋষীণাং পস্পৃধ্র ইন্দ্রে অধ্যুক্থার্কা ॥১॥

34.2

পুরুহূতো যঃ পুরুগূর্ত ঋভ্বাঁ একঃ পুরুপ্রশস্তো অস্তি যজ্ঞৈঃ ।
রথো ন মহে শবসে যুজানো৩ঽস্মাভিরিন্দ্রো অনুমাদ্যো ভূৎ ॥২॥

34.3

ন যং হিংসন্তি ধীতয়ো ন বাণীরিন্দ্রং নক্ষন্তীদভি বর্ধয়ন্তীঃ ।
যদি স্তোতারঃ শতং যত্সহস্রং গৃণন্তি গির্বণসং শং তদস্মৈ ॥৩॥

34.4

অস্মা এতদ্দিব্য১র্চেব মাসা মিমিক্ষ ইন্দ্রে ন্যয়ামি সোমঃ ।
জনং ন ধন্বন্নভি সং যদাপঃ সত্রা বাবৃধুর্হবনানি যজ্ঞৈঃ ॥৪॥

34.5

অস্মা এতন্মহ্যাঙ্গূষমস্মা ইন্দ্রায় স্তোত্রং মতিভিরবাচি ।
অসদ্যথা মহতি বৃত্রতূর্য ইন্দ্রো বিশ্বায়ুরবিতা বৃধশ্চ ॥৫॥