Sukta 34

34.1

5 shunahotro bharadvajah, indrah, trishtup

सं च॒ त्वे ज॒ग्मुर्गिर॑ इन्द्र पू॒र्वीर्वि च॒ त्वद्य॑न्ति वि॒भ्वो॑ मनी॒षाः ।
पु॒रा नू॒नं च॑ स्तु॒तय॒ ऋषी॑णां पस्पृ॒ध्र इन्द्रे॒ अध्यु॑क्था॒र्का ॥१॥

Sam cha tve jagmurgira indra purvirvi cha tvadyanti vibhvo manishah
Pura nunam cha stutaya rishinam paspridhra indre adhyuktharka

34.2

पु॒रु॒हू॒तो यः पु॑रुगू॒र्त ऋभ्वाँ॒ एक॑ः पुरुप्रश॒स्तो अस्ति॑ य॒ज्ञैः ।
रथो॒ न म॒हे शव॑से युजा॒नो॒३ऽस्माभि॒रिन्द्रो॑ अनु॒माद्यो॑ भूत् ॥२॥

Puruhuto yah purugurta ribhvam ekah puruprashasto asti yagyaih
Ratho na mahe shavase yujano3smabhirindro anumadyo bhut

34.3

न यं हिंस॑न्ति धी॒तयो॒ न वाणी॒रिन्द्रं॒ नक्ष॒न्तीद॒भि व॒र्धय॑न्तीः ।
यदि॑ स्तो॒तार॑ः श॒तं यत्स॒हस्रं॑ गृ॒णन्ति॒ गिर्व॑णसं॒ शं तद॑स्मै ॥३॥

Na yam hinsanti dhitayo na vanirindram nakshantidabhi vardhayantih
Yadi stotarah shatam yatsahasram grinanti girvanasam sham tadasmai

34.4

अस्मा॑ ए॒तद्दि॒व्य१र्चेव॑ मा॒सा मि॑मि॒क्ष इन्द्रे॒ न्य॑यामि॒ सोम॑ः ।
जनं॒ न धन्व॑न्न॒भि सं यदाप॑ः स॒त्रा वा॑वृधु॒र्हव॑नानि य॒ज्ञैः ॥४॥

Asma etaddivya1rcheva masa mimiksha indre nyayami somah
Janam na dhanvannabhi sam yadapah satra vavridhurhavanani yagyaih

34.5

अस्मा॑ ए॒तन्मह्या॑ङ्गू॒षम॑स्मा॒ इन्द्रा॑य स्तो॒त्रं म॒तिभि॑रवाचि ।
अस॒द्यथा॑ मह॒ति वृ॑त्र॒तूर्य॒ इन्द्रो॑ वि॒श्वायु॑रवि॒ता वृ॒धश्च॑ ॥५॥

Asma etanmahyangushamasma indraya stotram matibhiravachi
Asadyatha mahati vritraturya indro vishvayuravita vridhashcha