Sukta 33

33.1

5 shunahotro bharadvajah, indrah, trishtup

य ओजि॑ष्ठ इन्द्र॒ तं सु नो॑ दा॒ मदो॑ वृषन्त्स्वभि॒ष्टिर्दास्वा॑न् ।
सौव॑श्व्यं॒ यो व॒नव॒त्स्वश्वो॑ वृ॒त्रा स॒मत्सु॑ सा॒सह॑द॒मित्रा॑न् ॥१॥

Ya ojishtha indra tam su no da mado vrishantsvabhishtirdasvan
Sauvashvyam yo vanavatsvashvo vritra samatsu sasahadamitran

33.2

त्वां ही॒३न्द्राव॑से॒ विवा॑चो॒ हव॑न्ते चर्ष॒णय॒ः शूर॑सातौ ।
त्वं विप्रे॑भि॒र्वि प॒णीँर॑शाय॒स्त्वोत॒ इत्सनि॑ता॒ वाज॒मर्वा॑ ॥२॥

Tvam hi3ndravase vivacho havante charshanayah shurasatau
Tvam viprebhirvi paninrashayastvota itsanita vajamarva

33.3

त्वं ताँ इ॑न्द्रो॒भयाँ॑ अ॒मित्रा॒न्दासा॑ वृ॒त्राण्यार्या॑ च शूर ।
वधी॒र्वने॑व॒ सुधि॑तेभि॒रत्कै॒रा पृ॒त्सु द॑र्षि नृ॒णां नृ॑तम ॥३॥

Tvam tam indrobhayam amitrandasa vritranyarya cha shura
Vadhirvaneva sudhitebhiratkaira pritsu darshi nrinam nritama

33.4

स त्वं न॑ इ॒न्द्राक॑वाभिरू॒ती सखा॑ वि॒श्वायु॑रवि॒ता वृ॒धे भू॑ः ।
स्व॑र्षाता॒ यद्ध्वया॑मसि त्वा॒ युध्य॑न्तो ने॒मधि॑ता पृ॒त्सु शू॑र ॥४॥

Sa tvam na indrakavabhiruti sakha vishvayuravita vridhe bhuh
Svarshata yaddhvayamasi tva yudhyanto nemadhita pritsu shura

33.5

नू॒नं न॑ इन्द्राप॒राय॑ च स्या॒ भवा॑ मृळी॒क उ॒त नो॑ अ॒भिष्टौ॑ ।
इ॒त्था गृ॒णन्तो॑ म॒हिन॑स्य॒ शर्म॑न्दि॒वि ष्या॑म॒ पार्ये॑ गो॒षत॑माः ॥५॥

Nunam na indraparaya cha sya bhava mrilika uta no abhishtau
Ittha grinanto mahinasya sharmandivi shyama parye goshatamah