Sukta 32

32.1

5 suhotro bharadvajah, indrah, trishtup

अपू॑र्व्या पुरु॒तमा॑न्यस्मै म॒हे वी॒राय॑ त॒वसे॑ तु॒राय॑ ।
वि॒र॒प्शिने॑ व॒ज्रिणे॒ शंत॑मानि॒ वचां॑स्या॒सा स्थवि॑राय तक्षम् ॥१॥

Apurvya purutamanyasmai mahe viraya tavase turaya
Virapshine vajrine shantamani vachansyasa sthaviraya taksham

32.2

स मा॒तरा॒ सूर्ये॑णा कवी॒नामवा॑सयद्रु॒जदद्रिं॑ गृणा॒नः ।
स्वा॒धीभि॒ॠक्व॑भिर्वावशा॒न उदु॒स्रिया॑णामसृजन्नि॒दान॑म् ॥२॥

Sa matara suryena kavinamavasayadrujadadrim grinanah
Svadhibhirikvabhirvavashana udusriyanamasrijannidanam

32.3

स वह्नि॑भि॒ॠक्व॑भि॒र्गोषु॒ शश्व॑न्मि॒तज्ञु॑भिः पुरु॒कृत्वा॑ जिगाय ।
पुर॑ः पुरो॒हा सखि॑भिः सखी॒यन्दृ॒ळ्हा रु॑रोज क॒विभि॑ः क॒विः सन् ॥३॥

Sa vahnibhirikvabhirgoshu shashvanmitagyubhih purukritva jigaya
Purah puroha sakhibhih sakhiyandrilha ruroja kavibhih kavih san

32.4

स नी॒व्या॑भिर्जरि॒तार॒मच्छा॑ म॒हो वाजे॑भिर्म॒हद्भि॑श्च॒ शुष्मै॑ः ।
पु॒रु॒वीरा॑भिर्वृषभ क्षिती॒नामा गि॑र्वणः सुवि॒ताय॒ प्र या॑हि ॥४॥

Sa nivyabhirjaritaramachchha maho vajebhirmahadbhishcha shushmaih
Puruvirabhirvrishabha kshitinama girvanah suvitaya pra yahi

32.5

स सर्गे॑ण॒ शव॑सा त॒क्तो अत्यै॑र॒प इन्द्रो॑ दक्षिण॒तस्तु॑रा॒षाट् ।
इ॒त्था सृ॑जा॒ना अन॑पावृ॒दर्थं॑ दि॒वेदि॑वे विविषुरप्रमृ॒ष्यम् ॥५॥

Sa sargena shavasa takto atyairapa indro dakshinatasturashat
Ittha srijana anapavridartham divedive vivishurapramrishyam