Sukta 31

31.1

5 suhotro bharadvajah, indrah, trishtup, 4 shakvari

अभू॒रेको॑ रयिपते रयी॒णामा हस्त॑योरधिथा इन्द्र कृ॒ष्टीः ।
वि तो॒के अ॒प्सु तन॑ये च॒ सूरेऽवो॑चन्त चर्ष॒णयो॒ विवा॑चः ॥१॥

Abhureko rayipate rayinama hastayoradhitha indra krishtih
Vi toke apsu tanaye cha surevochanta charshanayo vivachah

त्वद्भि॒येन्द्र॒ पार्थि॑वानि॒ विश्वाच्यु॑ता चिच्च्यावयन्ते॒ रजां॑सि ।
द्यावा॒क्षामा॒ पर्व॑तासो॒ वना॑नि॒ विश्वं॑ दृ॒ळ्हं भ॑यते॒ अज्म॒न्ना ते॑ ॥२॥

Tvadbhiyendra parthivani vishvachyuta chichchyavayante rajansi
Dyavakshama parvataso vanani vishvam drilham bhayate ajmanna te

त्वं कुत्से॑ना॒भि शुष्ण॑मिन्द्रा॒शुषं॑ युध्य॒ कुय॑वं॒ गवि॑ष्टौ ।
दश॑ प्रपि॒त्वे अध॒ सूर्य॑स्य मुषा॒यश्च॒क्रमवि॑वे॒ रपां॑सि ॥३॥

Tvam kutsenabhi shushnamindrashusham yudhya kuyavam gavishtau
Dasha prapitve adha suryasya mushayashchakramavive rapansi

त्वं श॒तान्यव॒ शम्ब॑रस्य॒ पुरो॑ जघन्थाप्र॒तीनि॒ दस्यो॑ः ।
अशि॑क्षो॒ यत्र॒ शच्या॑ शचीवो॒ दिवो॑दासाय सुन्व॒ते सु॑तक्रे भ॒रद्वा॑जाय गृण॒ते वसू॑नि ॥४॥

Tvam shatanyava shambarasya puro jaghanthapratini dasyoh
Ashiksho yatra shachya shachivo divodasaya sunvate sutakre bharadvajaya grinate vasuni

स स॑त्यसत्वन्मह॒ते रणा॑य॒ रथ॒मा ति॑ष्ठ तुविनृम्ण भी॒मम् ।
या॒हि प्र॑पथि॒न्नव॒सोप॑ म॒द्रिक्प्र च॑ श्रुत श्रावय चर्ष॒णिभ्य॑ः ॥५॥

Sa satyasatvanmahate ranaya rathama tishtha tuvinrimna bhimam
Yahi prapathinnavasopa madrikpra cha shruta shravaya charshanibhyah