Sukta 30

30.1

5 barhaspatyo bharadvajah, indrah, trishtup

भूय॒ इद्वा॑वृधे वी॒र्या॑यँ॒ एको॑ अजु॒र्यो द॑यते॒ वसू॑नि ।
प्र रि॑रिचे दि॒व इन्द्र॑ः पृथि॒व्या अ॒र्धमिद॑स्य॒ प्रति॒ रोद॑सी उ॒भे ॥१॥

Bhuya idvavridhe viryayam eko ajuryo dayate vasuni
Pra ririche diva indrah prithivya ardhamidasya prati rodasi ubhe

अधा॑ मन्ये बृ॒हद॑सु॒र्य॑मस्य॒ यानि॑ दा॒धार॒ नकि॒रा मि॑नाति ।
दि॒वेदि॑वे॒ सूर्यो॑ दर्श॒तो भू॒द्वि सद्मा॑न्युर्वि॒या सु॒क्रतु॑र्धात् ॥२॥

Adha manye brihadasuryamasya yani dadhara nakira minati
Divedive suryo darshato bhudvi sadmanyurviya sukraturdhat

अ॒द्या चि॒न्नू चि॒त्तदपो॑ न॒दीनां॒ यदा॑भ्यो॒ अर॑दो गा॒तुमि॑न्द्र ।
नि पर्व॑ता अद्म॒सदो॒ न से॑दु॒स्त्वया॑ दृ॒ळ्हानि॑ सुक्रतो॒ रजां॑सि ॥३॥

Adya chinnu chittadapo nadinam yadabhyo arado gatumindra
Ni parvata admasado na sedustvaya drilhani sukrato rajansi

स॒त्यमित्तन्न त्वावाँ॑ अ॒न्यो अ॒स्तीन्द्र॑ दे॒वो न मर्त्यो॒ ज्याया॑न् ।
अह॒न्नहिं॑ परि॒शया॑न॒मर्णोऽवा॑सृजो अ॒पो अच्छा॑ समु॒द्रम् ॥४॥

Satyamittanna tvavam anyo astindra devo na martyo jyayan
Ahannahim parishayanamarnovasrijo apo achchha samudram

त्वम॒पो वि दुरो॒ विषू॑ची॒रिन्द्र॑ दृ॒ळ्हम॑रुज॒ः पर्व॑तस्य ।
राजा॑भवो॒ जग॑तश्चर्षणी॒नां सा॒कं सूर्यं॑ ज॒नय॒न्द्यामु॒षास॑म् ॥५॥

Tvamapo vi duro vishuchirindra drilhamarujah parvatasya
Rajabhavo jagatashcharshaninam sakam suryam janayandyamushasam