সূক্ত 25

25.1

৯ বার্হস্পত্যো ভরদ্বাজঃ । ইন্দ্রঃ । ত্রিষ্টুপ্ ।

যা ত ঊতিরবমা যা পরমা যা মধ্যমেন্দ্র শুষ্মিন্নস্তি ।
তাভিরূ ষু বৃত্রহত্যেঽবীর্ন এভিশ্চ বাজৈর্মহান্ ন উগ্র ॥১॥

আভিঃ স্পৃধো মিথতীররিষণ্যন্নমিত্রস্য ব্যথয়া মন্যুমিন্দ্র ।
আভির্বিশ্বা অভিয়ুজো বিষূচীরার্যায় বিশোঽব তারীর্দাসীঃ ॥২॥

ইন্দ্র জাময় উত যেঽজাময়োঽর্বাচীনাসো বনুষো যুয়ুজ্রে ।
ত্বমেষাং বিথুরা শবাংসি জহি বৃষ্ণ্যানি কৃণুহী পরাচঃ ॥৩॥

শূরো বা শূরং বনতে শরীরৈস্তনূরুচা তরুষি যৎ কৃণ্বৈতে ।
তোকে বা গোষু তনয়ে যদপ্সু বি ক্রন্দসী উর্বরাসু ব্রবৈতে ॥৪॥

নহি ত্বা শূরো ন তুরো ন ধৃষ্ণুর্ন ত্বা যোধো মন্যমানো যুয়োধ ।
ইন্দ্র নকিষ্ট্বা প্রত্যস্ত্যেষাং বিশ্বা জাতান্যভ্যসি তানি ॥৫॥

স পত্যত উভয়োর্নৃম্ণময়োর্যদী বেধসঃ সমিথে হবন্তে ।
বৃত্রে বা মহো নৃবতি ক্ষয়ে বা ব্যচস্বন্তা যদি বিতন্তসৈতে ॥৬॥

অধ স্মা তে চর্ষণয়ো যদেজানিন্দ্র ত্রাতোত ভবা বরূতা ।
অস্মাকাসো যে নৃতমাসো অর্য ইন্দ্র সূরয়ো দধিরে পুরো নঃ ॥৭॥

অনু তে দায়ি মহ ইন্দ্রিয়ায় সত্রা তে বিশ্বমনু বৃত্রহত্যে ।
অনু ক্ষত্রমনু সহো যজত্রেন্দ্র দেবেভিরনু তে নৃষহ্যে ॥৮॥

এবা নঃ স্পৃধঃ সমজা সমত্স্বিন্দ্র রারন্ধি মিথতীরদেবীঃ ।
বিদ্যাম বস্তোরবসা গৃণন্তো ভরদ্বাজা উত ত ইন্দ্র নূনম্ ॥৯॥