Sukta 25

25.1

9 barhaspatyo bharadvajah, indrah, trishtup

या त॑ ऊ॒तिर॑व॒मा या प॑र॒मा या म॑ध्य॒मेन्द्र॑ शुष्मि॒न्नस्ति॑ ।
ताभि॑रू॒ षु वृ॑त्र॒हत्ये॑ऽवीर्न ए॒भिश्च॒ वाजै॑र्म॒हान् न॑ उग्र ॥१॥

Ya ta utiravama ya parama ya madhyamendra shushminnasti
Tabhiru shu vritrahatyevirna ebhishcha vajairmahan na ugra

आभि॒ः स्पृधो॑ मिथ॒तीररि॑षण्यन्न॒मित्र॑स्य व्यथया म॒न्युमि॑न्द्र ।
आभि॒र्विश्वा॑ अभि॒युजो॒ विषू॑ची॒रार्या॑य॒ विशोऽव॑ तारी॒र्दासी॑ः ॥२॥

Abhih spridho mithatirarishanyannamitrasya vyathaya manyumindra
Abhirvishva abhiyujo vishuchiraryaya vishova tarirdasih

इन्द्र॑ जा॒मय॑ उ॒त येऽजा॑मयोऽर्वाची॒नासो॑ व॒नुषो॑ युयु॒ज्रे ।
त्वमे॑षां विथु॒रा शवां॑सि ज॒हि वृष्ण्या॑नि कृणु॒ही परा॑चः ॥३॥

Indra jamaya uta yejamayorvachinaso vanusho yuyujre
Tvamesham vithura shavansi jahi vrishnyani krinuhi parachah

शूरो॑ वा॒ शूरं॑ वनते॒ शरी॑रैस्तनू॒रुचा॒ तरु॑षि॒ यत् कृ॒ण्वैते॑ ।
तो॒के वा॒ गोषु॒ तन॑ये॒ यद॒प्सु वि क्रन्द॑सी उ॒र्वरा॑सु॒ ब्रवै॑ते ॥४॥

Shuro va shuram vanate shariraistanurucha tarushi yat krinvaite
Toke va goshu tanaye yadapsu vi krandasi urvarasu bravaite

न॒हि त्वा॒ शूरो॒ न तु॒रो न धृ॒ष्णुर्न त्वा॑ यो॒धो मन्य॑मानो यु॒योध॑ ।
इन्द्र॒ नकि॑ष्ट्वा॒ प्रत्य॑स्त्येषां॒ विश्वा॑ जा॒तान्य॒भ्य॑सि॒ तानि॑ ॥५॥

Nahi tva shuro na turo na dhrishnurna tva yodho manyamano yuyodha
Indra nakishtva pratyastyesham vishva jatanyabhyasi tani

स प॑त्यत उ॒भयो॑र्नृ॒म्णम॒योर्यदी॑ वे॒धस॑ः समि॒थे हव॑न्ते ।
वृ॒त्रे वा॑ म॒हो नृ॒वति॒ क्षये॑ वा॒ व्यच॑स्वन्ता॒ यदि॑ वितन्त॒सैते॑ ॥६॥

Sa patyata ubhayornrimnamayoryadi vedhasah samithe havante
Vritre va maho nrivati kshaye va vyachasvanta yadi vitantasaite

अध॑ स्मा ते चर्ष॒णयो॒ यदेजा॒निन्द्र॑ त्रा॒तोत भ॑वा वरू॒ता ।
अ॒स्माका॑सो॒ ये नृत॑मासो अ॒र्य इन्द्र॑ सू॒रयो॑ दधि॒रे पु॒रो न॑ः ॥७॥

Adha sma te charshanayo yadejanindra tratota bhava varuta
Asmakaso ye nritamaso arya indra surayo dadhire puro nah

अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये॑ ।
अनु॑ क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये॑ ॥८॥

Anu te dayi maha indriyaya satra te vishvamanu vritrahatye
Anu kshatramanu saho yajatrendra devebhiranu te nrishahye

ए॒वा न॒ः स्पृध॒ः सम॑जा स॒मत्स्विन्द्र॑ रार॒न्धि मि॑थ॒तीरदे॑वीः ।
वि॒द्याम॒ वस्तो॒रव॑सा गृ॒णन्तो॑ भ॒रद्वा॑जा उ॒त त॑ इन्द्र नू॒नम् ॥९॥

Eva nah spridhah samaja samatsvindra rarandhi mithatiradevih
Vidyama vastoravasa grinanto bharadvaja uta ta indra nunam