Sukta 26

26.1

8 barhaspatyo bharadvajah, indrah, trishtup

श्रु॒धी न॑ इन्द्र॒ ह्वया॑मसि त्वा म॒हो वाज॑स्य सा॒तौ वा॑वृषा॒णाः ।
सं यद् विशोऽय॑न्त॒ शूर॑साता उ॒ग्रं नोऽव॒ः पार्ये॒ अह॑न् दाः ॥१॥

Shrudhi na indra hvayamasi tva maho vajasya satau vavrishanah
Sam yad vishoyanta shurasata ugram novah parye ahan dah

त्वां वा॒जी ह॑वते वाजिने॒यो म॒हो वाज॑स्य॒ गध्य॑स्य सा॒तौ ।
त्वां वृ॒त्रेष्वि॑न्द्र॒ सत्प॑तिं॒ तरु॑त्रं॒ त्वां च॑ष्टे मुष्टि॒हा गोषु॒ युध्य॑न् ॥२॥

Tvam vaji havate vajineyo maho vajasya gadhyasya satau
Tvam vritreshvindra satpatim tarutram tvam chashte mushtiha goshu yudhyan

त्वं क॒विं चो॑दयो॒ऽर्कसा॑तौ॒ त्वं कुत्सा॑य॒ शुष्णं॑ दा॒शुषे॑ वर्क् ।
त्वं शिरो॑ अम॒र्मण॒ः परा॑हन्नतिथि॒ग्वाय॒ शंस्यं॑ करि॒ष्यन् ॥३॥

Tvam kavim chodayorkasatau tvam kutsaya shushnam dashushe vark
Tvam shiro amarmanah parahannatithigvaya shansyam karishyan

त्वं रथं॒ प्र भ॑रो यो॒धमृ॒ष्वमावो॒ युध्य॑न्तं वृष॒भं दश॑द्युम् ।
त्वं तुग्रं॑ वेत॒सवे॒ सचा॑ह॒न् त्वं तुजिं॑ गृ॒णन्त॑मिन्द्र तूतोः ॥४॥

Tvam ratham pra bharo yodhamrishvamavo yudhyantam vrishabham dashadyum
Tvam tugram vetasave sachahan tvam tujim grinantamindra tutoh

त्वं तदु॒क्थमि॑न्द्र ब॒र्हणा॑ क॒ः प्र यच्छ॒ता स॒हस्रा॑ शूर॒ दर्षि॑ ।
अव॑ गि॒रेर्दासं॒ शम्ब॑रं ह॒न्प्रावो॒ दिवो॑दासं चि॒त्राभि॑रू॒ती ॥५॥

Tvam tadukthamindra barhana kah pra yachchhata sahasra shura darshi
Ava girerdasam shambaram hanpravo divodasam chitrabhiruti

त्वं श्र॒द्धाभि॑र्मन्दसा॒नः सोमै॑र्द॒भीत॑ये॒ चुमु॑रिमिन्द्र सिष्वप् ।
त्वं र॒जिं पिठी॑नसे दश॒स्यन्ष॒ष्टिं स॒हस्रा॒ शच्या॒ सचा॑हन् ॥६॥

Tvam shraddhabhirmandasanah somairdabhitaye chumurimindra sishvap
Tvam rajim pithinase dashasyanshashtim sahasra shachya sachahan

अ॒हं च॒न तत्सू॒रिभि॑रानश्यां॒ तव॒ ज्याय॑ इन्द्र सु॒म्नमोज॑ः ।
त्वया॒ यत्स्तव॑न्ते सधवीर वी॒रास्त्रि॒वरू॑थेन॒ नहु॑षा शविष्ठ ॥७॥

Aham chana tatsuribhiranashyam tava jyaya indra sumnamojah
Tvaya yatstavante sadhavira virastrivaruthena nahusha shavishtha

व॒यं ते॑ अ॒स्यामि॑न्द्र द्यु॒म्नहू॑तौ॒ सखा॑यः स्याम महिन॒ प्रेष्ठा॑ः ।
प्रात॑र्दनिः क्षत्र॒श्रीर॑स्तु॒ श्रेष्ठो॑ घ॒ने वृ॒त्राणां॑ स॒नये॒ धना॑नाम् ॥८॥

Vayam te asyamindra dyumnahutau sakhayah syama mahina preshthah
Pratardanih kshatrashrirastu shreshtho ghane vritranam sanaye dhananam