Sukta 27

27.1

8 barhaspatyo bharadvajah, indrah, 8 abhyavarti chayamanah [ danah ], trishtup

किम॑स्य॒ मदे॒ किम्व॑स्य पी॒ताविन्द्र॒ः किम॑स्य स॒ख्ये च॑कार ।
रणा॑ वा॒ ये नि॒षदि॒ किं ते अ॑स्य पु॒रा वि॑विद्रे॒ किमु॒ नूत॑नासः ॥१॥

Kimasya made kimvasya pitavindrah kimasya sakhye chakara
Rana va ye nishadi kim te asya pura vividre kimu nutanasah

सद॑स्य॒ मदे॒ सद्व॑स्य पी॒ताविन्द्र॒ः सद॑स्य स॒ख्ये च॑कार ।
रणा॑ वा॒ ये नि॒षदि॒ सत्ते अ॑स्य पु॒रा वि॑विद्रे॒ सदु॒ नूत॑नासः ॥२॥

Sadasya made sadvasya pitavindrah sadasya sakhye chakara
Rana va ye nishadi satte asya pura vividre sadu nutanasah

न॒हि नु ते॑ महि॒मन॑ः समस्य॒ न म॑घवन्मघव॒त्त्वस्य॑ वि॒द्म ।
न राध॑सोराधसो॒ नूत॑न॒स्येन्द्र॒ नकि॑र्ददृश इन्द्रि॒यं ते॑ ॥३॥

Nahi nu te mahimanah samasya na maghavanmaghavattvasya vidma
Na radhasoradhaso nutanasyendra nakirdadrisha indriyam te

ए॒तत्त्यत्त॑ इन्द्रि॒यम॑चेति॒ येनाव॑धीर्व॒रशि॑खस्य॒ शेष॑ः ।
वज्र॑स्य॒ यत्ते॒ निह॑तस्य॒ शुष्मा॑त्स्व॒नाच्चि॑दिन्द्र पर॒मो द॒दार॑ ॥४॥

Etattyatta indriyamacheti yenavadhirvarashikhasya sheshah
Vajrasya yatte nihatasya shushmatsvanachchidindra paramo dadara

वधी॒दिन्द्रो॑ व॒रशि॑खस्य॒ शेषो॑ऽभ्याव॒र्तिने॑ चायमा॒नाय॒ शिक्ष॑न् ।
वृ॒चीव॑तो॒ यद्ध॑रियू॒पीया॑यां॒ हन्पूर्वे॒ अर्धे॑ भि॒यसाप॑रो॒ दर्त् ॥५॥

Vadhidindro varashikhasya sheshobhyavartine chayamanaya shikshan
Vrichivato yaddhariyupiyayam hanpurve ardhe bhiyasaparo dart

त्रिं॒शच्छ॑तं व॒र्मिण॑ इन्द्र सा॒कं य॒व्याव॑त्यां पुरुहूत श्रव॒स्या ।
वृ॒चीव॑न्त॒ः शर॑वे॒ पत्य॑माना॒ः पात्रा॑ भिन्दा॒ना न्य॒र्थान्या॑यन् ॥६॥

Trinshachchhatam varmina indra sakam yavyavatyam puruhuta shravasya
Vrichivantah sharave patyamanah patra bhindana nyarthanyayan

यस्य॒ गावा॑वरु॒षा सू॑यव॒स्यू अ॒न्तरू॒ षु चर॑तो॒ रेरि॑हाणा ।
स सृञ्ज॑याय तु॒र्वशं॒ परा॑दाद्वृ॒चीव॑तो दैववा॒ताय॒ शिक्ष॑न् ॥७॥

Yasya gavavarusha suyavasyu antaru shu charato rerihana
Sa srinjayaya turvasham paradadvrichivato daivavataya shikshan

द्व॒याँ अ॑ग्ने र॒थिनो॑ विंश॒तिं गा व॒धूम॑तो म॒घवा॒ मह्यं॑ स॒म्राट् ।
अ॒भ्या॒व॒र्ती चा॑यमा॒नो द॑दाति दू॒णाशे॒यं दक्षि॑णा पार्थ॒वाना॑म् ॥८॥

Dvayam agne rathino vinshatim ga vadhumato maghava mahyam samrat
Abhyavarti chayamano dadati dunasheyam dakshina parthavanam