Sukta 24

24.1

10 barhaspatyo bharadvajah, indrah, trishtup

वृषा॒ मद॒ इन्द्रे॒ श्लोक॑ उ॒क्था सचा॒ सोमे॑षु सुत॒पा ऋ॑जी॒षी ।
अ॒र्च॒त्र्यो॑ म॒घवा॒ नृभ्य॑ उ॒क्थैर्द्यु॒क्षो राजा॑ गि॒रामक्षि॑तोतिः ॥१॥

Vrisha mada indre shloka uktha sacha someshu sutapa rijishi
Archatryo maghava nribhya ukthairdyuksho raja giramakshitotih

ततु॑रिर्वी॒रो नर्यो॒ विचे॑ता॒ः श्रोता॒ हवं॑ गृण॒त उ॒र्व्यू॑तिः ।
वसु॒ः शंसो॑ न॒रां का॒रुधा॑या वा॒जी स्तु॒तो वि॒दथे॑ दाति॒ वाज॑म् ॥२॥

Taturirviro naryo vichetah shrota havam grinata urvyutih
Vasuh shanso naram karudhaya vaji stuto vidathe dati vajam

अक्षो॒ न च॒क्र्यो॑ः शूर बृ॒हन् प्र ते॑ म॒ह्ना रि॑रिचे॒ रोद॑स्योः ।
वृ॒क्षस्य॒ नु ते॑ पुरुहूत व॒या व्यू॒३तयो॑ रुरुहुरिन्द्र पू॒र्वीः ॥३॥

Aksho na chakryoh shura brihan pra te mahna ririche rodasyoh
Vrikshasya nu te puruhuta vaya vyu3tayo ruruhurindra purvih

शची॑वतस्ते पुरुशाक॒ शाका॒ गवा॑मिव स्रु॒तय॑ः सं॒चर॑णीः ।
व॒त्सानां॒ न त॒न्तय॑स्त इन्द्र॒ दाम॑न्वन्तो अदा॒मान॑ः सुदामन् ॥४॥

Shachivataste purushaka shaka gavamiva srutayah sancharanih
Vatsanam na tantayasta indra damanvanto adamanah sudaman

अ॒न्यद॒द्य कर्व॑रम॒न्यदु॒ श्वो ऽस॑च्च॒ सन्मुहु॑राच॒क्रिरिन्द्र॑ः ।
मि॒त्रो नो॒ अत्र॒ वरु॑णश्च पू॒षा ऽर्यो वश॑स्य पर्ये॒तास्ति॑ ॥५॥

Anyadadya karvaramanyadu shvo sachcha sanmuhurachakririndrah
Mitro no atra varunashcha pusha ryo vashasya paryetasti

वि त्वदापो॒ न पर्व॑तस्य पृ॒ष्ठादु॒क्थेभि॑रिन्द्रानयन्त य॒ज्ञैः ।
तं त्वा॒भिः सु॑ष्टु॒तिभि॑र्वा॒जय॑न्त आ॒जिं न ज॑ग्मुर्गिर्वाहो॒ अश्वा॑ः ॥६॥

Vi tvadapo na parvatasya prishthadukthebhirindranayanta yagyaih
Tam tvabhih sushtutibhirvajayanta ajim na jagmurgirvaho ashvah

न यं जर॑न्ति श॒रदो॒ न मासा॒ न द्याव॒ इन्द्र॑मवक॒र्शय॑न्ति ।
वृ॒द्धस्य॑ चिद् वर्धतामस्य त॒नूः स्तोमे॑भिरु॒क्थैश्च॑ श॒स्यमा॑ना ॥७॥

Na yam jaranti sharado na masa na dyava indramavakarshayanti
Vriddhasya chid vardhatamasya tanuh stomebhirukthaishcha shasyamana

न वी॒ळवे॒ नम॑ते॒ न स्थि॒राय॒ न शर्ध॑ते॒ दस्यु॑जूताय स्त॒वान् ।
अज्रा॒ इन्द्र॑स्य गि॒रय॑श्चिदृ॒ष्वा ग॑म्भी॒रे चि॑द् भवति गा॒धम॑स्मै ॥८॥

Na vilave namate na sthiraya na shardhate dasyujutaya stavan
Ajra indrasya girayashchidrishva gambhire chid bhavati gadhamasmai

ग॒म्भी॒रेण॑ न उ॒रुणा॑मत्रि॒न् प्रेषो य॑न्धि सुतपाव॒न् वाजा॑न् ।
स्था ऊ॒ षु ऊ॒र्ध्व ऊ॒ती अरि॑षण्यन्न॒क्तोर्व्यु॑ष्टौ॒ परि॑तक्म्यायाम् ॥९॥

Gambhirena na urunamatrin presho yandhi sutapavan vajan
Stha u shu urdhva uti arishanyannaktorvyushtau paritakmyayam

सच॑स्व ना॒यमव॑से अ॒भीक॑ इ॒तो वा॒ तमि॑न्द्र पाहि रि॒षः ।
अ॒मा चै॑न॒मर॑ण्ये पाहि रि॒षो मदे॑म श॒तहि॑माः सु॒वीरा॑ः ॥१०॥

Sachasva nayamavase abhika ito va tamindra pahi rishah
Ama chainamaranye pahi risho madema shatahimah suvirah