Sukta 23

23.1

10 barhaspatyo bharadvajah, indrah, trishtup

सु॒त इत् त्वं निमि॑श्ल इन्द्र॒ सोमे॒ स्तोमे॒ ब्रह्म॑णि श॒स्यमा॑न उ॒क्थे ।
यद् वा॑ यु॒क्ताभ्यां॑ मघव॒न् हरि॑भ्यां॒ बिभ्र॒द् वज्रं॑ बा॒ह्वोरि॑न्द्र॒ यासि॑ ॥१॥

Suta it tvam nimishla indra some stome brahmani shasyamana ukthe
Yad va yuktabhyam maghavan haribhyam bibhrad vajram bahvorindra yasi

23.2

यद् वा॑ दि॒वि पार्ये॒ सुष्वि॑मिन्द्र वृत्र॒हत्येऽव॑सि॒ शूर॑सातौ ।
यद् वा॑ दक्ष॑स्य बि॒भ्युषो॒ अबि॑भ्य॒दर॑न्धय॒ः शर्ध॑त इन्द्र॒ दस्यू॑न् ॥२॥

Yad va divi parye sushvimindra vritrahatyevasi shurasatau
Yad va dakshasya bibhyusho abibhyadarandhayah shardhata indra dasyun

23.3

पाता॑ सु॒तमिन्द्रो॑ अस्तु॒ सोमं॑ प्रणे॒नीरु॒ग्रो ज॑रि॒तार॑मू॒ती ।
कर्ता॑ वी॒राय॒ सुष्व॑य उ लो॒कं दाता॒ वसु॑ स्तुव॒ते की॒रये॑ चित् ॥३॥

Pata sutamindro astu somam pranenirugro jaritaramuti
Karta viraya sushvaya u lokam data vasu stuvate kiraye chit

23.4

गन्तेया॑न्ति॒ सव॑ना॒ हरि॑भ्यां ब॒भ्रिर्वज्रं॑ प॒पिः सोमं॑ द॒दिर्गाः ।
कर्ता॑ वी॒रं नर्यं॒ सर्व॑वीरं॒ श्रोता॒ हवं॑ गृण॒तः स्तोम॑वाहाः ॥४॥

Ganteyanti savana haribhyam babhrirvajram papih somam dadirgah
Karta viram naryam sarvaviram shrota havam grinatah stomavahah

23.5

अस्मै॑ व॒यं यद् वा॒वान॒ तद् वि॑विष्म॒ इन्द्रा॑य॒ यो न॑ः प्र॒दिवो॒ अप॒स्कः ।
सु॒ते सोमे॑ स्तु॒मसि॒ शंस॑दु॒क्थेन्द्रा॑य॒ ब्रह्म॒ वर्ध॑नं॒ यथास॑त् ॥५॥

Asmai vayam yad vavana tad vivishma indraya yo nah pradivo apaskah
Sute some stumasi shansadukthendraya brahma vardhanam yathasat

23.6

ब्रह्मा॑णि॒ हि च॑कृ॒षे वर्ध॑नानि॒ ताव॑त् त इन्द्र म॒तिभि॑र्विविष्मः ।
सु॒ते सोमे॑ सुतपा॒ः शंत॑मानि॒ रान्द्या॑ क्रियास्म॒ वक्ष॑णानि य॒ज्ञैः ॥६॥

Brahmani hi chakrishe vardhanani tavat ta indra matibhirvivishmah
Sute some sutapah shantamani randya kriyasma vakshanani yagyaih

23.7

स नो॑ बोधि पुरो॒ळाशं॒ ररा॑ण॒ः पिबा॒ तु सोमं॒ गोऋ॑जीकमिन्द्र ।
एदं ब॒र्हिर्यज॑मानस्य सीदो॒रुं कृ॑धि त्वाय॒त उ॑ लो॒कम् ॥७॥

Sa no bodhi purolasham raranah piba tu somam gorijikamindra
Edam barhiryajamanasya sidorum kridhi tvayata u lokam

23.8

स म॑न्दस्वा॒ ह्यनु॒ जोष॑मुग्र॒ प्र त्वा॑ य॒ज्ञास॑ इ॒मे अ॑श्नुवन्तु ।
प्रेमे हवा॑सः पुरुहू॒तम॒स्मे आ त्वे॒यं धीरव॑स इन्द्र यम्याः ॥८॥

Sa mandasva hyanu joshamugra pra tva yagyasa ime ashnuvantu
Preme havasah puruhutamasme a tveyam dhiravasa indra yamyah

23.9

तं व॑ः सखाय॒ः सं यथा॑ सु॒तेषु॒ सोमे॑भिरीं पृणता भो॒जमिन्द्र॑म् ।
कु॒वित् तस्मा॒ अस॑ति नो॒ भरा॑य॒ न सुष्वि॒मिन्द्रोऽव॑से मृधाति ॥९॥

Tam vah sakhayah sam yatha suteshu somebhirim prinata bhojamindram
Kuvit tasma asati no bharaya na sushvimindrovase mridhati

23.10

ए॒वेदिन्द्र॑ः सु॒ते अ॑स्तावि॒ सोमे॑ भ॒रद्वा॑जेषु॒ क्षय॒दिन्म॒घोन॑ः ।
अस॒द् यथा॑ जरि॒त्र उ॒त सू॒रिरिन्द्रो॑ रा॒यो वि॒श्ववा॑रस्य दा॒ता ॥१०॥

Evedindrah sute astavi some bharadvajeshu kshayadinmaghonah
Asad yatha jaritra uta suririndro rayo vishvavarasya data