Sukta 22

22.1

11 barhaspatyo bharadvajah, indrah, trishtup

य एक॒ इद्धव्य॑श्चर्षणी॒नामिन्द्रं॒ तं गी॒र्भिर॒भ्य॑र्च आ॒भिः ।
यः पत्य॑ते वृष॒भो वृष्ण्या॑वान् त्स॒त्यः सत्वा॑ पुरुमा॒यः सह॑स्वान् ॥१॥

Ya eka iddhavyashcharshaninamindram tam girbhirabhyarcha abhih
Yah patyate vrishabho vrishnyavan tsatyah satva purumayah sahasvan

22.2

तमु॑ न॒ः पूर्वे॑ पि॒तरो॒ नव॑ग्वाः स॒प्त विप्रा॑सो अ॒भि वा॒जय॑न्तः ।
न॒क्ष॒द्दा॒भं ततु॑रिं पर्वते॒ष्ठामद्रो॑घवाचं म॒तिभि॒ः शवि॑ष्ठम् ॥२॥

Tamu nah purve pitaro navagvah sapta vipraso abhi vajayantah
Nakshaddabham taturim parvateshthamadroghavacham matibhih shavishtham

22.3

तमी॑मह॒ इन्द्र॑मस्य रा॒यः पु॑रु॒वीर॑स्य नृ॒वत॑ः पुरु॒क्षोः ।
यो अस्कृ॑धोयुर॒जर॒ः स्व॑र्वा॒न् तमा भ॑र हरिवो माद॒यध्यै॑ ॥३॥

Tamimaha indramasya rayah puruvirasya nrivatah purukshoh
Yo askridhoyurajarah svarvan tama bhara harivo madayadhyai

22.4

तन्नो॒ वि वो॑चो॒ यदि॑ ते पु॒रा चि॑ज्जरि॒तार॑ आन॒शुः सु॒म्नमि॑न्द्र ।
कस्ते॑ भा॒गः किं वयो॑ दुध्र खिद्व॒ः पुरु॑हूत पुरूवसोऽसुर॒घ्नः ॥४॥

Tanno vi vocho yadi te pura chijjaritara anashuh sumnamindra
Kaste bhagah kim vayo dudhra khidvah puruhuta puruvasosuraghnah

22.5

तं पृ॒च्छन्ती॒ वज्र॑हस्तं रथे॒ष्ठामिन्द्रं॒ वेपी॒ वक्व॑री॒ यस्य॒ नू गीः ।
तु॒वि॒ग्रा॒भं तु॑विकू॒र्मिं र॑भो॒दां गा॒तुमि॑षे॒ नक्ष॑ते॒ तुम्र॒मच्छ॑ ॥५॥

Tam prichchhanti vajrahastam ratheshthamindram vepi vakvari yasya nu gih
Tuvigrabham tuvikurmim rabhodam gatumishe nakshate tumramachchha

22.6

अ॒या ह॒ त्यं मा॒यया॑ वावृधा॒नं म॑नो॒जुवा॑ स्वतव॒ः पर्व॑तेन ।
अच्यु॑ता चिद् वीळि॒ता स्वो॑जो रु॒जो वि दृ॒ळ्हा धृ॑ष॒ता वि॑रप्शिन् ॥६॥

Aya ha tyam mayaya vavridhanam manojuva svatavah parvatena
Achyuta chid vilita svojo rujo vi drilha dhrishata virapshin

22.7

तं वो॑ धि॒या नव्य॑स्या॒ शवि॑ष्ठं प्र॒त्नं प्र॑त्न॒वत् प॑रितंस॒यध्यै॑ ।
स नो॑ वक्षदनिमा॒नः सु॒वह्मेन्द्रो॒ विश्वा॒न्यति॑ दु॒र्गहा॑णि ॥७॥

Tam vo dhiya navyasya shavishtham pratnam pratnavat paritansayadhyai
Sa no vakshadanimanah suvahmendro vishvanyati durgahani

22.8

आ जना॑य॒ द्रुह्व॑णे॒ पार्थि॑वानि दि॒व्यानि॑ दीपयो॒ऽन्तरि॑क्षा ।
तपा॑ वृषन् वि॒श्वत॑ः शो॒चिषा॒ तान् ब्र॑ह्म॒द्विषे॑ शोचय॒ क्षाम॒पश्च॑ ॥८॥

A janaya druhvane parthivani divyani dipayontariksha
Tapa vrishan vishvatah shochisha tan brahmadvishe shochaya kshamapashcha

22.9

भुवो॒ जन॑स्य दि॒व्यस्य॒ राजा॒ पार्थि॑वस्य॒ जग॑तस्त्वेषसंदृक् ।
धि॒ष्व वज्रं॒ दक्षि॑ण इन्द्र॒ हस्ते॒ विश्वा॑ अजुर्य दयसे॒ वि मा॒याः ॥९॥

Bhuvo janasya divyasya raja parthivasya jagatastveshasandrik
Dhishva vajram dakshina indra haste vishva ajurya dayase vi mayah

22.10

आ सं॒यत॑मिन्द्र णः स्व॒स्तिं श॑त्रु॒तूर्या॑य बृह॒तीममृ॑ध्राम् ।
यया॒ दासा॒न्यार्या॑णि वृ॒त्रा करो॑ वज्रिन् सु॒तुका॒ नाहु॑षाणि ॥१०॥

A sanyatamindra nah svastim shatruturyaya brihatimamridhram
Yaya dasanyaryani vritra karo vajrin sutuka nahushani

22.11

स नो॑ नि॒युद्भि॑ः पुरुहूत वेधो वि॒श्ववा॑राभि॒रा ग॑हि प्रयज्यो ।
न या अदे॑वो॒ वर॑ते॒ न दे॒व आभि॑र्याहि॒ तूय॒मा म॑द्र्य॒द्रिक् ॥११॥

Sa no niyudbhih puruhuta vedho vishvavarabhira gahi prayajyo
Na ya adevo varate na deva abhiryahi tuyama madryadrik