সূক্ত 22

22.1

১১ বার্হস্পত্যো ভরদ্বাজঃ । ইন্দ্রঃ ।ত্রিষ্টুপ্ ।

য এক ইদ্ধব্যশ্চর্ষণীনামিন্দ্রং তং গীর্ভিরভ্যর্চ আভিঃ ।
যঃ পত্যতে বৃষভো বৃষ্ণ্যাবান্ ত্সত্যঃ সত্বা পুরুমায়ঃ সহস্বান্ ॥১॥

22.2

তমু নঃ পূর্বে পিতরো নবগ্বাঃ সপ্ত বিপ্রাসো অভি বাজয়ন্তঃ ।
নক্ষদ্দাভং ততুরিং পর্বতেষ্ঠামদ্রোঘবাচং মতিভিঃ শবিষ্ঠম্ ॥২॥

22.3

তমীমহ ইন্দ্রমস্য রায়ঃ পুরুবীরস্য নৃবতঃ পুরুক্ষোঃ ।
যো অস্কৃধোয়ুরজরঃ স্বর্বান্ তমা ভর হরিবো মাদয়ধ্যৈ ॥৩॥

22.4

তন্নো বি বোচো যদি তে পুরা চিজ্জরিতার আনশুঃ সুম্নমিন্দ্র ।
কস্তে ভাগঃ কিং বয়ো দুধ্র খিদ্বঃ পুরুহূত পুরূবসোঽসুরঘ্নঃ ॥৪॥

22.5

তং পৃচ্ছন্তী বজ্রহস্তং রথেষ্ঠামিন্দ্রং বেপী বক্বরী যস্য নূ গীঃ ।
তুবিগ্রাভং তুবিকূর্মিং রভোদাং গাতুমিষে নক্ষতে তুম্রমচ্ছ ॥৫॥

22.6

অয়া হ ত্যং মায়য়া বাবৃধানং মনোজুবা স্বতবঃ পর্বতেন ।
অচ্যুতা চিদ্ বীলিতা স্বোজো রুজো বি দৃল্হা ধৃষতা বিরপ্শিন্ ॥৬॥

22.7

তং বো ধিয়া নব্যস্যা শবিষ্ঠং প্রত্নং প্রত্নবৎ পরিতংসয়ধ্যৈ ।
স নো বক্ষদনিমানঃ সুবহ্মেন্দ্রো বিশ্বান্যতি দুর্গহাণি ॥৭॥

22.8

আ জনায় দ্রুহ্বণে পার্থিবানি দিব্যানি দীপয়োঽন্তরিক্ষা ।
তপা বৃষন্ বিশ্বতঃ শোচিষা তান্ ব্রহ্মদ্বিষে শোচয় ক্ষামপশ্চ ॥৮॥

22.9

ভুবো জনস্য দিব্যস্য রাজা পার্থিবস্য জগতস্ত্বেষসংদৃক্ ।
ধিষ্ব বজ্রং দক্ষিণ ইন্দ্র হস্তে বিশ্বা অজুর্য দয়সে বি মায়াঃ ॥৯॥

22.10

আ সংয়তমিন্দ্র ণঃ স্বস্তিং শত্রুতূর্যায় বৃহতীমমৃধ্রাম্ ।
যয়া দাসান্যার্যাণি বৃত্রা করো বজ্রিন্ সুতুকা নাহুষাণি ॥১০॥

22.11

স নো নিয়ুদ্ভিঃ পুরুহূত বেধো বিশ্ববারাভিরা গহি প্রয়জ্যো ।
ন যা অদেবো বরতে ন দেব আভির্যাহি তূয়মা মদ্র্যদ্রিক্ ॥১১॥