সূক্ত 21

21.1

১২ বার্হস্পত্যো ভরদ্বাজঃ । ইন্দ্রঃ, ৯ , ১১ বিশ্বে দেবাঃ । ত্রিষ্টুপ্ ।

ইমা উ ত্বা পুরুতমস্য কারোর্হব্যং বীর হব্যা হবন্তে ।
ধিয়ো রথেষ্ঠামজরং নবীয়ো রয়ির্বিভূতিরীয়তে বচস্যা ॥১॥

21.2

তমু স্তুষ ইন্দ্রং যো বিদানো গির্বাহসং গীর্ভির্যজ্ঞবৃদ্ধম্ ।
যস্য দিবমতি মহ্না পৃথিব্যাঃ পুরুমায়স্য রিরিচে মহিত্বম্ ॥২॥

21.3

স ইৎ তমোঽবয়ুনং ততন্বৎ সূর্যেণ বয়ুনবচ্চকার ।
কদা তে মর্তা অমৃতস্য ধামেয়ক্ষন্তো ন মিনন্তি স্বধাবঃ ॥৩॥

21.4

যস্তা চকার স কুহ স্বিদিন্দ্রঃ কমা জনং চরতি কাসু বিক্ষু ।
কস্তে যজ্ঞো মনসে শং বরায় কো অর্ক ইন্দ্র কতমঃ স হোতা ॥৪॥

21.5

ইদা হি তে বেবিষতঃ পুরাজাঃ প্রত্নাস আসুঃ পুরুকৃৎ সখায়ঃ ।
যে মধ্যমাস উত নূতনাস উতাবমস্য পুরুহূত বোধি ॥৫॥

21.6

তং পৃচ্ছন্তোঽবরাসঃ পরাণি প্রত্না ত ইন্দ্র শ্রুত্যানু যেমুঃ ।
অর্চামসি বীর ব্রহ্মবাহো যাদেব বিদ্ম তাৎ ত্বা মহান্তম্ ॥৬॥

21.7

অভি ত্বা পাজো রক্ষসো বি তস্থে মহি জজ্ঞানমভি তৎ সু তিষ্ঠ ।
তব প্রত্নেন যুজ্যেন সখ্যা বজ্রেণ ধৃষ্ণো অপ তা নুদস্ব ॥৭॥

21.8

স তু শ্রুধীন্দ্র নূতনস্য ব্রহ্মণ্যতো বীর কারুধায়ঃ ।
ত্বং হ্যা৩পিঃ প্রদিবি পিতৄণাং শশ্বদ্ বভূথ সুহব এষ্টৌ ॥৮॥

21.9

প্রোতয়ে বরুণং মিত্রমিন্দ্রং মরুতঃ কৃষ্বাবসে নো অদ্য ।
প্র পূষণং বিষ্ণুমগ্নিং পুরংধিং সবিতারমোষধীঃ পর্বতাঁশ্চ ॥৯॥

21.10

ইম উ ত্বা পুরুশাক প্রয়জ্যো জরিতারো অভ্যর্চন্ত্যর্কৈঃ ।
শ্রুধী হবমা হুবতো হুবানো ন ত্বাবাঁ অন্যো অমৃত ত্বদস্তি ॥১০॥

21.11

নূ ম আ বাচমুপ যাহি বিদ্বান্ বিশ্বেভিঃ সূনো সহসো যজত্রৈঃ ।
যে অগ্নিজিহ্বা ঋতসাপ আসুর্যে মনুং চক্রুরুপরং দসায় ॥১১॥

21.12

স নো বোধি পুরএতা সুগেষূত দুর্গেষু পথিকৃদ্ বিদানঃ ।
যে অশ্রমাস উরবো বহিষ্ঠাস্তেভির্ন ইন্দ্রাভি বক্ষি বাজম্ ॥১২॥