সূক্ত 20

20.1

১৩ বার্হস্পত্যো ভরদ্বাজঃ । ইন্দ্রঃ । ত্রিষ্টুপ্ , ৭ বিরাট্ ।

দ্যৌর্ন য ইন্দ্রাভি ভূমার্যস্তস্থৌ রয়িঃ শবসা পৃত্সু জনান্ ।
তং নঃ সহস্রভরমুর্বরাসাং দদ্ধি সূনো সহসো বৃত্রতুরম্ ॥১॥

দিবো ন তুভ্যমন্বিন্দ্র সত্রা ঽসুর্যং দেবেভির্ধায়ি বিশ্বম্ ।
অহিং যদ্ বৃত্রমপো বব্রিবাংসং হন্নৃজীষিন্ বিষ্ণুনা সচানঃ ॥২॥

তূর্বন্নোজীয়ান্ তবসস্তবীয়ান্ কৃতব্রহ্মেন্দ্রো বৃদ্ধমহাঃ ।
রাজাভবন্মধুনঃ সোম্যস্য বিশ্বাসাং যৎ পুরাং দর্ত্নুমাবৎ ॥৩॥

শতৈরপদ্রন্ পণয় ইন্দ্রাত্র দশোণয়ে কবয়েঽর্কসাতৌ ।
বধৈঃ শুষ্ণস্যাশুষস্য মায়াঃ পিত্বো নারিরেচীৎ কিং চন প্র ॥৪॥

মহো দ্রুহো অপ বিশ্বায়ু ধায়ি বজ্রস্য যৎ পতনে পাদি শুষ্ণঃ ।
উরু ষ সরথং সারথয়ে করিন্দ্রঃ কুত্সায় সূর্যস্য সাতৌ ॥৫॥

প্র শ্যেনো ন মদিরমংশুমস্মৈ শিরো দাসস্য নমুচের্মথায়ন্ ।
প্রাবন্নমীং সাপ্যং সসন্তং পৃণগ্রায়া সমিষা সং স্বস্তি ॥৬॥

বি পিপ্রোরহিমায়স্য দৃল্হাঃ পুরো বজ্রিঞ্ছবসা ন দর্দঃ ।
সুদামন্ তদ্ রেক্ণো অপ্রমৃষ্যমৃজিশ্বনে দাত্রং দাশুষে দাঃ ॥৭॥

স বেতসুং দশমায়ং দশোণিং তূতুজিমিন্দ্রঃ স্বভিষ্টিসুম্নঃ ।
আ তুগ্রং শশ্বদিভং দ্যোতনায় মাতুর্ন সীমুপ সৃজা ইয়ধ্যৈ ॥৮॥

স ঈং স্পৃধো বনতে অপ্রতীতো বিভ্রদ্ বজ্রং বৃত্রহণং গভস্তৌ ।
তিষ্ঠদ্ধরী অধ্যস্তেব গর্তে বচোয়ুজা বহত ইন্দ্রমৃষ্বম্ ॥৯॥

সনেম তেঽবসা নব্য ইন্দ্র প্র পূরবঃ স্তবন্ত এনা যজ্ঞৈঃ ।
সপ্ত যৎ পুরঃ শর্ম শারদীর্দর্দ্ধন্ দাসীঃ পুরুকুত্সায় শিক্ষন্ ॥১০॥

ত্বং বৃধ ইন্দ্র পূর্ব্যো ভূর্বরিবস্যন্নুশনে কাব্যায় ।
পরা নববাস্ত্বমনুদেয়ং মহে পিত্রে দদাথ স্বং নপাতম্ ॥১১॥

ত্বং ধুনিরিন্দ্র ধুনিমতীৠণোরপঃ সীরা ন স্রবন্তীঃ ।
প্র যত্সমুদ্রমতি শূর পর্ষি পারয়া তুর্বশং যদুং স্বস্তি ॥১২॥

তব হ ত্যদিন্দ্র বিশ্বমাজৌ সস্তো ধুনীচুমুরী যা হ সিষ্বপ্ ।
দীদয়দিৎ তুভ্যং সোমেভিঃ সুন্বন্ দভীতিরিধ্মভৃতিঃ পক্থ্য১র্কৈঃ ॥১৩॥