সূক্ত 23

23.1

১০ বার্হস্পত্যো ভরদ্বাজঃ । ইন্দ্রঃ ।ত্রিষ্টুপ্ ।

সুত ইৎ ত্বং নিমিশ্ল ইন্দ্র সোমে স্তোমে ব্রহ্মণি শস্যমান উক্থে ।
যদ্ বা যুক্তাভ্যাং মঘবন্ হরিভ্যাং বিভ্রদ্ বজ্রং বাহ্বোরিন্দ্র যাসি ॥১॥

যদ্ বা দিবি পার্যে সুষ্বিমিন্দ্র বৃত্রহত্যেঽবসি শূরসাতৌ ।
যদ্ বা দক্ষস্য বিভ্যুষো অবিভ্যদরন্ধয়ঃ শর্ধত ইন্দ্র দস্যূন্ ॥২॥

পাতা সুতমিন্দ্রো অস্তু সোমং প্রণেনীরুগ্রো জরিতারমূতী ।
কর্তা বীরায় সুষ্বয় উ লোকং দাতা বসু স্তুবতে কীরয়ে চিৎ ॥৩॥

গন্তেয়ান্তি সবনা হরিভ্যাং বভ্রির্বজ্রং পপিঃ সোমং দদির্গাঃ ।
কর্তা বীরং নর্যং সর্ববীরং শ্রোতা হবং গৃণতঃ স্তোমবাহাঃ ॥৪॥

অস্মৈ বয়ং যদ্ বাবান তদ্ বিবিষ্ম ইন্দ্রায় যো নঃ প্রদিবো অপস্কঃ ।
সুতে সোমে স্তুমসি শংসদুক্থেন্দ্রায় ব্রহ্ম বর্ধনং যথাসৎ ॥৫॥

ব্রহ্মাণি হি চকৃষে বর্ধনানি তাবৎ ত ইন্দ্র মতিভির্বিবিষ্মঃ ।
সুতে সোমে সুতপাঃ শংতমানি রান্দ্যা ক্রিয়াস্ম বক্ষণানি যজ্ঞৈঃ ॥৬॥

স নো বোধি পুরোলাশং ররাণঃ পিবা তু সোমং গোঋজীকমিন্দ্র ।
এদং বর্হির্যজমানস্য সীদোরুং কৃধি ত্বায়ত উ লোকম্ ॥৭॥

স মন্দস্বা হ্যনু জোষমুগ্র প্র ত্বা যজ্ঞাস ইমে অশ্নুবন্তু ।
প্রেমে হবাসঃ পুরুহূতমস্মে আ ত্বেয়ং ধীরবস ইন্দ্র যম্যাঃ ॥৮॥

তং বঃ সখায়ঃ সং যথা সুতেষু সোমেভিরীং পৃণতা ভোজমিন্দ্রম্ ।
কুবিৎ তস্মা অসতি নো ভরায় ন সুষ্বিমিন্দ্রোঽবসে মৃধাতি ॥৯॥

এবেদিন্দ্রঃ সুতে অস্তাবি সোমে ভরদ্বাজেষু ক্ষয়দিন্মঘোনঃ ।
অসদ্ যথা জরিত্র উত সূরিরিন্দ্রো রায়ো বিশ্ববারস্য দাতা ॥১০॥