সূক্ত 17

17.1

১৫ বার্হস্পত্যো ভরদ্বাজঃ । ইন্দ্রঃ ।ত্রিষ্টুপ্ , ১৫ দ্বিপদা বিরাট্ ।

পিবা সোমমভি যমুগ্র তর্দ ঊর্বং গব্যং মহি গৃণান ইন্দ্র ।
বি যো ধৃষ্ণো বধিষো বজ্রহস্ত বিশ্বা বৃত্রমমিত্রিয়া শবোভিঃ ॥১॥

স ঈং পাহি য ঋজীষী তরুত্রো যঃ শিপ্রবান্ বৃষভো যো মতীনাম্ ।
যো গোত্রভিদ্ বজ্রভৃদ্ যো হরিষ্ঠাঃ স ইন্দ্র চিত্রাঁ অভি তৃন্ধি বাজান্ ॥২॥

এবা পাহি প্রত্নথা মন্দতু ত্বা শ্রুধি ব্রহ্ম বাবৃধস্বোত গীর্ভিঃ ।
আবিঃ সূর্যং কৃণুহি পীপিহীষো জহি শত্রূঁরভি গা ইন্দ্র তৃন্ধি ॥৩॥

তে ত্বা মদা বৃহদিন্দ্র স্বধাব ইমে পীতা উক্ষয়ন্ত দ্যুমন্তম্ ।
মহামনূনং তবসং বিভূতিং মত্সরাসো জর্হৃষন্ত প্রসাহম্ ॥৪॥

যেভিঃ সূর্যমুষসং মন্দসানো ঽবাসয়োঽপ দৃল্হানি দর্দ্রৎ ।
মহামদ্রিং পরি গা ইন্দ্র সন্তং নুত্থা অচ্যুতং সদসস্পরি স্বাৎ ॥৫॥

তব ক্রত্বা তব তদ্ দংসনাভিরামাসু পক্বং শচ্যা নি দীধঃ ।
ঔর্ণোর্দুর উস্রিয়াভ্যো বি দৃল্হোদূর্বাদ্ গা অসৃজো অঙ্গিরস্বান্ ॥৬॥

পপ্রাথ ক্ষাং মহি দংসো ব্যু১র্বীমুপ দ্যামৃষ্বো বৃহদিন্দ্র স্তভায়ঃ ।
অধারয়ো রোদসী দেবপুত্রে প্রত্নে মাতরা যহ্বী ঋতস্য ॥৭॥

অধ ত্বা বিশ্বে পুর ইন্দ্র দেবা একং তবসং দধিরে ভরায় ।
অদেবো যদভ্যৌহিষ্ট দেবান্ ত্স্বর্ষাতা বৃণত ইন্দ্রমত্র ॥৮॥

অধ দ্যৌশ্চিৎ তে অপ সা নু বজ্রাদ্ দ্বিতানমদ্ ভিয়সা স্বস্য মন্যোঃ ।
অহিং যদিন্দ্রো অভ্যোহসানং নি চিদ্ বিশ্বায়ুঃ শয়থে জঘান ॥৯॥

অধ ত্বষ্টা তে মহ উগ্র বজ্রং সহস্রভৃষ্টিং ববৃতচ্ছতাশ্রিম্ ।
নিকামমরমণসং যেন নবন্তমহিং সং পিণগৃজীষিন্ ॥১০॥

বর্ধান্ যং বিশ্বে মরুতঃ সজোষাঃ পচচ্ছতং মহিষাঁ ইন্দ্র তুভ্যম্ ।
পূষা বিষ্ণুস্ত্রীণি সরাংসি ধাবন্ বৃত্রহণং মদিরমংশুমস্মৈ ॥১১॥

আ ক্ষোদো মহি বৃতং নদীনাং পরিষ্ঠিতমসৃজ ঊর্মিমপাম্ ।
তাসামনু প্রবত ইন্দ্র পন্থাং প্রার্দয়ো নীচীরপসঃ সমুদ্রম্ ॥১২॥

এবা তা বিশ্বা চকৃবাংসমিন্দ্রং মহামুগ্রমজুর্যং সহোদাম্ ।
সুবীরং ত্বা স্বায়ুধং সুবজ্রমা ব্রহ্ম নব্যমবসে ববৃত্যাৎ ॥১৩॥

স নো বাজায় শ্রবস ইষে চ রায়ে ধেহি দ্যুমত ইন্দ্র বিপ্রান্ ।
ভরদ্বাজে নৃবত ইন্দ্র সূরীন্ দিবি চ স্মৈধি পার্যে ন ইন্দ্র ॥১৪॥

অয়া বাজং দেবহিতং সনেম মদেম শতহিমাঃ সুবীরাঃ ॥১৫॥