Sukta 17

17.1

15 barhaspatyo bharadvajah, indrah, trishtup, 15 dvipada virat

पिबा॒ सोम॑म॒भि यमु॑ग्र॒ तर्द॑ ऊ॒र्वं गव्यं॒ महि॑ गृणा॒न इ॑न्द्र ।
वि यो धृ॑ष्णो॒ वधि॑षो वज्रहस्त॒ विश्वा॑ वृ॒त्रम॑मि॒त्रिया॒ शवो॑भिः ॥१॥

Piba somamabhi yamugra tarda urvam gavyam mahi grinana indra
Vi yo dhrishno vadhisho vajrahasta vishva vritramamitriya shavobhih

17.2

स ईं॑ पाहि॒ य ऋ॑जी॒षी तरु॑त्रो॒ यः शिप्र॑वान् वृष॒भो यो म॑ती॒नाम् ।
यो गो॑त्र॒भिद् व॑ज्र॒भृद् यो ह॑रि॒ष्ठाः स इ॑न्द्र चि॒त्राँ अ॒भि तृ॑न्धि॒ वाजा॑न् ॥२॥

Sa im pahi ya rijishi tarutro yah shipravan vrishabho yo matinam
Yo gotrabhid vajrabhrid yo harishthah sa indra chitram abhi trindhi vajan

17.3

ए॒वा पा॑हि प्र॒त्नथा॒ मन्द॑तु त्वा श्रु॒धि ब्रह्म॑ वावृ॒धस्वो॒त गी॒र्भिः ।
आ॒विः सूर्यं॑ कृणु॒हि पी॑पि॒हीषो॑ ज॒हि शत्रूँ॑र॒भि गा इ॑न्द्र तृन्धि ॥३॥

Eva pahi pratnatha mandatu tva shrudhi brahma vavridhasvota girbhih
Avih suryam krinuhi pipihisho jahi shatrunrabhi ga indra trindhi

17.4

ते त्वा॒ मदा॑ बृ॒हदि॑न्द्र स्वधाव इ॒मे पी॒ता उ॑क्षयन्त द्यु॒मन्त॑म् ।
म॒हामनू॑नं त॒वसं॒ विभू॑तिं मत्स॒रासो॑ जर्हृषन्त प्र॒साह॑म् ॥४॥

Te tva mada brihadindra svadhava ime pita ukshayanta dyumantam
Mahamanunam tavasam vibhutim matsaraso jarhrishanta prasaham

17.5

येभि॒ः सूर्य॑मु॒षसं॑ मन्दसा॒नो ऽवा॑स॒योऽप॑ दृ॒ळ्हानि॒ दर्द्र॑त् ।
म॒हामद्रिं॒ परि॒ गा इ॑न्द्र॒ सन्तं॑ नु॒त्था अच्यु॑तं॒ सद॑स॒स्परि॒ स्वात् ॥५॥

Yebhih suryamushasam mandasano vasayopa drilhani dardrat
Mahamadrim pari ga indra santam nuttha achyutam sadasaspari svat

17.6

तव॒ क्रत्वा॒ तव॒ तद् दं॒सना॑भिरा॒मासु॑ प॒क्वं शच्या॒ नि दी॑धः ।
और्णो॒र्दुर॑ उ॒स्रिया॑भ्यो॒ वि दृ॒ळ्होदू॒र्वाद् गा अ॑सृजो॒ अङ्गि॑रस्वान् ॥६॥

Tava kratva tava tad dansanabhiramasu pakvam shachya ni didhah
Aurnordura usriyabhyo vi drilhodurvad ga asrijo angirasvan

17.7

प॒प्राथ॒ क्षां महि॒ दंसो॒ व्यु१र्वीमुप॒ द्यामृ॒ष्वो बृ॒हदि॑न्द्र स्तभायः ।
अधा॑रयो॒ रोद॑सी दे॒वपु॑त्रे प्र॒त्ने मा॒तरा॑ य॒ह्वी ऋ॒तस्य॑ ॥७॥

Papratha ksham mahi danso vyu1rvimupa dyamrishvo brihadindra stabhayah
Adharayo rodasi devaputre pratne matara yahvi ritasya

17.8

अध॑ त्वा॒ विश्वे॑ पु॒र इ॑न्द्र दे॒वा एकं॑ त॒वसं॑ दधिरे॒ भरा॑य ।
अदे॑वो॒ यद॒भ्यौहि॑ष्ट दे॒वान् त्स्व॑र्षाता वृणत॒ इन्द्र॒मत्र॑ ॥८॥

Adha tva vishve pura indra deva ekam tavasam dadhire bharaya
Adevo yadabhyauhishta devan tsvarshata vrinata indramatra

17.9

अध॒ द्यौश्चि॑त् ते॒ अप॒ सा नु वज्रा॑द् द्वि॒तान॑मद् भि॒यसा॒ स्वस्य॑ म॒न्योः ।
अहिं॒ यदिन्द्रो॑ अ॒भ्योह॑सानं॒ नि चि॑द् वि॒श्वायु॑ः श॒यथे॑ ज॒घान॑ ॥९॥

Adha dyaushchit te apa sa nu vajrad dvitanamad bhiyasa svasya manyoh
Ahim yadindro abhyohasanam ni chid vishvayuh shayathe jaghana

17.10

अध॒ त्वष्टा॑ ते म॒ह उ॑ग्र॒ वज्रं॑ स॒हस्र॑भृष्टिं ववृतच्छ॒ताश्रि॑म् ।
निका॑मम॒रम॑णसं॒ येन॒ नव॑न्त॒महिं॒ सं पि॑णगृजीषिन् ॥१०॥

Adha tvashta te maha ugra vajram sahasrabhrishtim vavritachchhatashrim
Nikamamaramanasam yena navantamahim sam pinagrijishin

17.11

वर्धा॒न् यं विश्वे॑ म॒रुत॑ः स॒जोषा॒ः पच॑च्छ॒तं म॑हि॒षाँ इ॑न्द्र॒ तुभ्य॑म् ।
पू॒षा विष्णु॒स्त्रीणि॒ सरां॑सि धावन् वृत्र॒हणं॑ मदि॒रमं॒शुम॑स्मै ॥११॥

Vardhan yam vishve marutah sajoshah pachachchhatam mahisham indra tubhyam
Pusha vishnustrini saransi dhavan vritrahanam madiramanshumasmai

17.12

आ क्षोदो॒ महि॑ वृ॒तं न॒दीनां॒ परि॑ष्ठितमसृज ऊ॒र्मिम॒पाम् ।
तासा॒मनु॑ प्र॒वत॑ इन्द्र॒ पन्थां॒ प्रार्द॑यो॒ नीची॑र॒पस॑ः समु॒द्रम् ॥१२॥

A kshodo mahi vritam nadinam parishthitamasrija urmimapam
Tasamanu pravata indra pantham prardayo nichirapasah samudram

17.13

ए॒वा ता विश्वा॑ चकृ॒वांस॒मिन्द्रं॑ म॒हामु॒ग्रम॑जु॒र्यं स॑हो॒दाम् ।
सु॒वीरं॑ त्वा स्वायु॒धं सु॒वज्र॒मा ब्रह्म॒ नव्य॒मव॑से ववृत्यात् ॥१३॥

Eva ta vishva chakrivansamindram mahamugramajuryam sahodam
Suviram tva svayudham suvajrama brahma navyamavase vavrityat

17.14

स नो॒ वाजा॑य॒ श्रव॑स इ॒षे च॑ रा॒ये धे॑हि द्यु॒मत॑ इन्द्र॒ विप्रा॑न् ।
भ॒रद्वा॑जे नृ॒वत॑ इन्द्र सू॒रीन् दि॒वि च॑ स्मैधि॒ पार्ये॑ न इन्द्र ॥१४॥

Sa no vajaya shravasa ishe cha raye dhehi dyumata indra vipran
Bharadvaje nrivata indra surin divi cha smaidhi parye na indra

17.15

अ॒या वाजं॑ दे॒वहि॑तं सनेम॒ मदे॑म श॒तहि॑माः सु॒वीरा॑ः ॥१५॥

Aya vajam devahitam sanema madema shatahimah suvirah