সূক্ত 18

18.1

১৫ বার্হস্পত্যো ভরদ্বাজঃ । ইন্দ্রঃ ।ত্রিষ্টুপ্ ।

তমু ষ্টুহি যো অভিভূত্যোজা বন্বন্নবাতঃ পুরুহূত ইন্দ্রঃ ।
অষাল্হমুগ্রং সহমানমাভির্গীর্ভির্বর্ধ বৃষভং চর্ষণীনাম্ ॥১॥

স যুধ্মঃ সত্বা খজকৃৎ সমদ্বা তুবিম্রক্ষো নদনুমাঁ ঋজীষী ।
বৃহদ্রেণুশ্চ্যবনো মানুষীণামেকঃ কৃষ্টীনামভবৎ সহাবা ॥২॥

ত্বং হ নু ত্যদদমায়ো দস্যূঁরেকঃ কৃষ্টীরবনোরার্যায় ।
অস্তি স্বিন্নু বীর্যং১ তৎ ত ইন্দ্র ন স্বিদস্তি তদৃতুথা বি বোচঃ ॥৩॥

সদিদ্ধি তে তুবিজাতস্য মন্যে সহঃ সহিষ্ঠ তুরতস্তুরস্য ।
উগ্রমুগ্রস্য তবসস্তবীয়ো ঽরধ্রস্য রধ্রতুরো বভূব ॥৪॥

তন্নঃ প্রত্নং সখ্যমস্তু যুষ্মে ইত্থা বদদ্ভির্বলমঙ্গিরোভিঃ ।
হন্নচ্যুতচ্যুদ্ দস্মেষয়ন্তমৃণোঃ পুরো বি দুরো অস্য বিশ্বাঃ ॥৫॥

স হি ধীভির্হব্যো অস্ত্যুগ্র ঈশানকৃন্মহতি বৃত্রতূর্যে ।
স তোকসাতা তনয়ে স বজ্রী বিতন্তসায্যো অভবৎ সমত্সু ॥৬॥

স মজ্মনা জনিম মানুষাণামমর্ত্যেন নাম্নাতি প্র সর্স্রে ।
স দ্যুম্নেন স শবসোত রায়া স বীর্যেণ নৃতমঃ সমোকাঃ ॥৭॥

স যো ন মুহে ন মিথূ জনো ভূৎ সুমন্তুনামা চুমুরিং ধুনিং চ ।
বৃণক্ পিপ্রুং শম্বরং শুষ্ণমিন্দ্রঃ পুরাং চ্যৌত্নায় শয়থায় নূ চিৎ ॥৮॥

উদাবতা ত্বক্ষসা পন্যসা চ বৃত্রহত্যায় রথমিন্দ্র তিষ্ঠ ।
ধিষ্ব বজ্রং হস্ত আ দক্ষিণত্রা ঽভি প্র মন্দ পুরুদত্র মায়াঃ ॥৯॥

অগ্নির্ন শুষ্কং বনমিন্দ্র হেতী রক্ষো নি ধক্ষ্যশনির্ন ভীমা ।
গম্ভীরয় ঋষ্বয়া যো রুরোজাধ্বানয়দ্ দুরিতা দম্ভয়চ্চ ॥১০॥

আ সহস্রং পথিভিরিন্দ্র রায়া তুবিদ্যুম্ন তুবিবাজেভিরর্বাক্ ।
যাহি সূনো সহসো যস্য নূ চিদদেব ঈশে পুরুহূত যোতোঃ ॥১১॥

প্র তুবিদ্যুম্নস্য স্থবিরস্য ঘৃষ্বের্দিবো ররপ্শে মহিমা পৃথিব্যাঃ ।
নাস্য শত্রুর্ন প্রতিমানমস্তি ন প্রতিষ্ঠিঃ পুরুমায়স্য সহ্যোঃ ॥১২॥

প্র তৎ তে অদ্যা করণং কৃতং ভূৎ কুত্সং যদায়ুমতিথিগ্বমস্মৈ ।
পুরূ সহস্রা নি শিশা অভি ক্ষামুৎ তূর্বয়াণং ধৃষতা নিনেথ ॥১৩॥

অনু ত্বাহিঘ্নে অধ দেব দেবা মদন্ বিশ্বে কবিতমং কবীনাম্ ।
করো যত্র বরিবো বাধিতায় দিবে জনায় তন্বে গৃণানঃ ॥১৪॥

অনু দ্যাবাপৃথিবী তৎ ত ওজো ঽমর্ত্যা জিহত ইন্দ্র দেবাঃ ।
কৃষ্বা কৃত্নো অকৃতং যৎ তে অস্ত্যুক্থং নবীয়ো জনয়স্ব যজ্ঞৈঃ ॥১৫॥