সূক্ত 15

15.1

১৯ বার্হস্পত্যো ভরদ্বাজো, বীতহব্য আঙ্গিরসো বা । অগ্নি : ।জগতী; ৩; ১৫ শক্বরী; ৬ অতিশক্বরী; ১০ – ১৪, ১৬,১৯ ত্রিষ্টুপ্ , ১৭ অনুষ্টুপ্ ; ১৮ বৃহতী ।

ইমমূ ষু বো অতিথিমুষর্বুধং বিশ্বাসাং বিশাং পতিমৃঞ্জসে গিরা ।
বেতীদ্ দিবো জনুষা কচ্চিদা শুচির্জ্যোক্ চিদত্তি গর্ভো যদচ্যুতম্ ॥১॥

15.2

মিত্রং ন যং সুধিতং ভৃগবো দধুর্বনস্পতাবীড্যমূর্ধ্বশোচিষম্ ।
স ত্বং সুপ্রীতো বীতহব্যে অদ্ভুত প্রশস্তিভির্মহয়সে দিবেদিবে ॥২॥

15.3

স ত্বং দক্ষস্যাবৃকো বৃধো ভূরর্যঃ পরস্যান্তরস্য তরুষঃ ।
রায়ঃ সূনো সহসো মর্ত্যেষ্বা ছর্দির্যচ্ছ বীতহব্যায় সপ্রথো ভরদ্বাজায় সপ্রথঃ ॥৩॥

15.4

দ্যুতানং বো অতিথিং স্বর্ণরমগ্নিং হোতারং মনুষঃ স্বধ্বরম্ ।
বিপ্রং ন দ্যুক্ষবচসং সুবৃক্তিভির্হব্যবাহমরতিং দেবমৃঞ্জসে ॥৪॥

15.5

পাবকয়া যশ্চিতয়ন্ত্যা কৃপা ক্ষামন্ রুরুচ উষসো ন ভানুনা ।
তূর্বন্ ন যামন্নেতশস্য নূ রণ আ যো ঘৃণে ন ততৃষাণো অজরঃ ॥৫॥

15.6

অগ্নিমগ্নিং বঃ সমিধা দুবস্যত প্রিয়ংপ্রিয়ং বো অতিথিং গৃণীষণি ।
উপ বো গীর্ভিরমৃতং বিবাসত দেবো দেবেষু বনতে হি বার্যং দেবো দেবেষু বনতে হি নো দুবঃ ॥৬॥

15.7

সমিদ্ধমগ্নিং সমিধা গিরা গৃণে শুচিং পাবকং পুরো অধ্বরে ধ্রুবম্ ।
বিপ্রং হোতারং পুরুবারমদ্রুহং কবিং সুম্নৈরীমহে জাতবেদসম্ ॥৭॥

15.8

ত্বাং দূতমগ্নে অমৃতং যুগেয়ুগে হব্যবাহং দধিরে পায়ুমীড্যম্ ।
দেবাসশ্চ মর্তাসশ্চ জাগৃবিং বিভুং বিশ্পতিং নমসা নি ষেদিরে ॥৮॥

15.9

বিভূষন্নগ্ন উভয়াঁ অনু ব্রতা দূতো দেবানাং রজসী সমীয়সে ।
যৎ তে ধীতিং সুমতিমাবৃণীমহে ঽধ স্মা নস্ত্রিবরূথঃ শিবো ভব ॥৯॥

15.10

তং সুপ্রতীকং সুদৃশং স্বঞ্চমবিদ্বাংসো বিদুষ্টরং সপেম ।
স যক্ষদ্ বিশ্বা বয়ুনানি বিদ্বান্ প্র হব্যমগ্নিরমৃতেষু বোচৎ ॥১০॥

15.11

তমগ্নে পাস্যুত তং পিপর্ষি যস্ত আনট্ কবয়ে শূর ধীতিম্ ।
যজ্ঞস্য বা নিশিতিং বোদিতিং বা তমিৎ পৃণক্ষি শবসোত রায়া ॥১১॥

15.12

ত্বমগ্নে বনুষ্যতো নি পাহি ত্বমু নঃ সহসাবন্নবদ্যাৎ ।
সং ত্বা ধ্বস্মন্বদভ্যেতু পাথঃ সং রয়িঃ স্পৃহয়ায্যঃ সহস্রী ॥১২॥

15.13

অগ্নির্হোতা গৃহপতিঃ স রাজা বিশ্বা বেদ জনিমা জাতবেদাঃ ।
দেবানামুত যো মর্ত্যানাং যজিষ্ঠঃ স প্র যজতামৃতাবা ॥১৩॥

15.14

অগ্নে যদদ্য বিশো অধ্বরস্য হোতঃ পাবকশোচে বেষ্ট্বং হি যজ্বা ।
ঋতা যজাসি মহিনা বি যদ্ ভূর্হব্যা বহ যবিষ্ঠ যা তে অদ্য ॥১৪॥

15.15

অভি প্রয়াংসি সুধিতানি হি খ্যো নি ত্বা দধীত রোদসী যজধ্যৈ ।
অবা নো মঘবন্ বাজসাতাবগ্নে বিশ্বানি দুরিতা তরেম তা তরেম তবাবসা তরেম ॥১৫॥

15.16

অগ্নে বিশ্বেভিঃ স্বনীক দেবৈরূর্ণাবন্তং প্রথমঃ সীদ যোনিম্ ।
কুলায়িনং ঘৃতবন্তং সবিত্রে যজ্ঞং নয় যজমানায় সাধু ॥১৬॥

15.17

ইমমু ত্যমথর্ববদগ্নিং মন্থন্তি বেধসঃ । যমঙ্কূয়ন্তমানয়ন্নমূরং শ্যাব্যাভ্যঃ ॥১৭॥

15.18

জনিষ্বা দেববীতয়ে সর্বতাতা স্বস্তয়ে । আ দেবান্ বক্ষ্যমৃতাঁ ঋতাবৃধো যজ্ঞং দেবেষু পিস্পৃশঃ ॥১৮॥

15.19

বয়মু ত্বা গৃহপতে জনানামগ্নে অকর্ম সমিধা বৃহন্তম্ ।
অস্থূরি নো গার্হপত্যানি সন্তু তিগ্মেন নস্তেজসা সং শিশাধি ॥১৯॥