Sukta 15

15.1

19 barhaspatyo bharadvajo, vitahavya angiraso va, agni :, jagati; 3; 15 shakvari; 6 atishakvari; 10 – 14, 16, 19 trishtup, 17 anushtup ; 18 brihati

इ॒ममू॒ षु वो॒ अति॑थिमुष॒र्बुधं॒ विश्वा॑सां वि॒शां पति॑मृञ्जसे गि॒रा ।
वेतीद् दि॒वो ज॒नुषा॒ कच्चि॒दा शुचि॒र्ज्योक् चि॑दत्ति॒ गर्भो॒ यदच्यु॑तम् ॥१॥

Imamu shu vo atithimusharbudham vishvasam visham patimrinjase gira
Vetid divo janusha kachchida shuchirjyok chidatti garbho yadachyutam

15.2

मि॒त्रं न यं सुधि॑तं॒ भृग॑वो द॒धुर्वन॒स्पता॒वीड्य॑मू॒र्ध्वशो॑चिषम् ।
स त्वं सुप्री॑तो वी॒तह॑व्ये अद्भुत॒ प्रश॑स्तिभिर्महयसे दि॒वेदि॑वे ॥२॥

Mitram na yam sudhitam bhrigavo dadhurvanaspatavidyamurdhvashochisham
Sa tvam suprito vitahavye adbhuta prashastibhirmahayase divedive

15.3

स त्वं दक्ष॑स्यावृ॒को वृ॒धो भू॑र॒र्यः पर॒स्यान्त॑रस्य॒ तरु॑षः ।
रा॒यः सू॑नो सहसो॒ मर्त्ये॒ष्वा छ॒र्दिर्य॑च्छ वी॒तह॑व्याय स॒प्रथो॑ भ॒रद्वा॑जाय स॒प्रथ॑ः ॥३॥

Sa tvam dakshasyavriko vridho bhuraryah parasyantarasya tarushah
Rayah suno sahaso martyeshva chhardiryachchha vitahavyaya sapratho bharadvajaya saprathah

15.4

द्यु॒ता॒नं वो॒ अति॑थिं॒ स्व॑र्णरम॒ग्निं होता॑रं॒ मनु॑षः स्वध्व॒रम् ।
विप्रं॒ न द्यु॒क्षव॑चसं सुवृ॒क्तिभि॑र्हव्य॒वाह॑मर॒तिं दे॒वमृ॑ञ्जसे ॥४॥

Dyutanam vo atithim svarnaramagnim hotaram manushah svadhvaram
Vipram na dyukshavachasam suvriktibhirhavyavahamaratim devamrinjase

15.5

पा॒व॒कया॒ यश्चि॒तय॑न्त्या कृ॒पा क्षाम॑न् रुरु॒च उ॒षसो॒ न भा॒नुना॑ ।
तूर्व॒न् न याम॒न्नेत॑शस्य॒ नू रण॒ आ यो घृ॒णे न त॑तृषा॒णो अ॒जर॑ः ॥५॥

Pavakaya yashchitayantya kripa kshaman rurucha ushaso na bhanuna
Turvan na yamannetashasya nu rana a yo ghrine na tatrishano ajarah

15.6

अ॒ग्निम॑ग्निं वः स॒मिधा॑ दुवस्यत प्रि॒यंप्रि॑यं वो॒ अति॑थिं गृणी॒षणि॑ ।
उप॑ वो गी॒र्भिर॒मृतं॑ विवासत दे॒वो दे॒वेषु॒ वन॑ते॒ हि वार्यं॑ दे॒वो दे॒वेषु॒ वन॑ते॒ हि नो॒ दुव॑ः ॥६॥

Agnimagnim vah samidha duvasyata priyampriyam vo atithim grinishani
Upa vo girbhiramritam vivasata devo deveshu vanate hi varyam devo deveshu vanate hi no duvah

15.7

समि॑द्धम॒ग्निं स॒मिधा॑ गि॒रा गृ॑णे॒ शुचिं॑ पाव॒कं पु॒रो अ॑ध्व॒रे ध्रु॒वम् ।
विप्रं॒ होता॑रं पुरु॒वार॑म॒द्रुहं॑ क॒विं सु॒म्नैरी॑महे जा॒तवे॑दसम् ॥७॥

Samiddhamagnim samidha gira grine shuchim pavakam puro adhvare dhruvam
Vipram hotaram puruvaramadruham kavim sumnairimahe jatavedasam

15.8

त्वां दू॒तम॑ग्ने अ॒मृतं॑ यु॒गेयु॑गे हव्य॒वाहं॑ दधिरे पा॒युमीड्य॑म् ।
दे॒वास॑श्च॒ मर्ता॑सश्च॒ जागृ॑विं वि॒भुं वि॒श्पतिं॒ नम॑सा॒ नि षे॑दिरे ॥८॥

Tvam dutamagne amritam yugeyuge havyavaham dadhire payumidyam
Devasashcha martasashcha jagrivim vibhum vishpatim namasa ni shedire

15.9

वि॒भूष॑न्नग्न उ॒भयाँ॒ अनु॑ व्र॒ता दू॒तो दे॒वानां॒ रज॑सी॒ समी॑यसे ।
यत् ते॑ धी॒तिं सु॑म॒तिमा॑वृणी॒महे ऽध॑ स्मा नस्त्रि॒वरू॑थः शि॒वो भ॑व ॥९॥

Vibhushannagna ubhayam anu vrata duto devanam rajasi samiyase
Yat te dhitim sumatimavrinimahe dha sma nastrivaruthah shivo bhava

15.10

तं सु॒प्रती॑कं सु॒दृशं॒ स्वञ्च॒मवि॑द्वांसो वि॒दुष्ट॑रं सपेम ।
स य॑क्ष॒द् विश्वा॑ व॒युना॑नि वि॒द्वान् प्र ह॒व्यम॒ग्निर॒मृते॑षु वोचत् ॥१०॥

Tam supratikam sudrisham svanchamavidvanso vidushtaram sapema
Sa yakshad vishva vayunani vidvan pra havyamagniramriteshu vochat

15.11

तम॑ग्ने पास्यु॒त तं पि॑पर्षि॒ यस्त॒ आन॑ट् क॒वये॑ शूर धी॒तिम् ।
य॒ज्ञस्य॑ वा॒ निशि॑तिं॒ वोदि॑तिं वा॒ तमित् पृ॑णक्षि॒ शव॑सो॒त रा॒या ॥११॥

Tamagne pasyuta tam piparshi yasta anat kavaye shura dhitim
Yagyasya va nishitim voditim va tamit prinakshi shavasota raya

15.12

त्वम॑ग्ने वनुष्य॒तो नि पा॑हि॒ त्वमु॑ नः सहसावन्नव॒द्यात् ।
सं त्वा॑ ध्वस्म॒न्वद॒भ्ये॑तु॒ पाथ॒ः सं र॒यिः स्पृ॑ह॒याय्य॑ः सह॒स्री ॥१२॥

Tvamagne vanushyato ni pahi tvamu nah sahasavannavadyat
Sam tva dhvasmanvadabhyetu pathah sam rayih sprihayayyah sahasri

15.13

अ॒ग्निर्होता॑ गृ॒हप॑ति॒ः स राजा॒ विश्वा॑ वेद॒ जनि॑मा जा॒तवे॑दाः ।
दे॒वाना॑मु॒त यो मर्त्या॑नां॒ यजि॑ष्ठ॒ः स प्र य॑जतामृ॒तावा॑ ॥१३॥

Agnirhota grihapatih sa raja vishva veda janima jatavedah
Devanamuta yo martyanam yajishthah sa pra yajatamritava

15.14

अग्ने॒ यद॒द्य वि॒शो अ॑ध्वरस्य होत॒ः पाव॑कशोचे॒ वेष्ट्वं हि यज्वा॑ ।
ऋ॒ता य॑जासि महि॒ना वि यद् भूर्ह॒व्या व॑ह यविष्ठ॒ या ते॑ अ॒द्य ॥१४॥

Agne yadadya visho adhvarasya hotah pavakashoche veshtvam hi yajva
Rita yajasi mahina vi yad bhurhavya vaha yavishtha ya te adya

15.15

अ॒भि प्रयां॑सि॒ सुधि॑तानि॒ हि ख्यो नि त्वा॑ दधीत॒ रोद॑सी॒ यज॑ध्यै ।
अवा॑ नो मघव॒न् वाज॑साता॒वग्ने॒ विश्वा॑नि दुरि॒ता त॑रेम॒ ता त॑रेम॒ तवाव॑सा तरेम ॥१५॥

Abhi prayansi sudhitani hi khyo ni tva dadhita rodasi yajadhyai
Ava no maghavan vajasatavagne vishvani durita tarema ta tarema tavavasa tarema

15.16

अग्ने॒ विश्वे॑भिः स्वनीक दे॒वैरूर्णा॑वन्तं प्रथ॒मः सी॑द॒ योनि॑म् ।
कु॒ला॒यिनं॑ घृ॒तव॑न्तं सवि॒त्रे य॒ज्ञं न॑य॒ यज॑मानाय सा॒धु ॥१६॥

Agne vishvebhih svanika devairurnavantam prathamah sida yonim
Kulayinam ghritavantam savitre yagyam naya yajamanaya sadhu

15.17

इ॒ममु॒ त्यम॑थर्व॒वद॒ग्निं म॑न्थन्ति वे॒धस॑ः । यम॑ङ्कू॒यन्त॒मान॑य॒न्नमू॑रं श्या॒व्या॑भ्यः ॥१७॥

Imamu tyamatharvavadagnim manthanti vedhasah, yamankuyantamanayannamuram shyavyabhyah

15.18

जनि॑ष्वा दे॒ववी॑तये स॒र्वता॑ता स्व॒स्तये॑ । आ दे॒वान् व॑क्ष्य॒मृताँ॑ ऋता॒वृधो॑ य॒ज्ञं दे॒वेषु॑ पिस्पृशः ॥१८॥

Janishva devavitaye sarvatata svastaye, a devan vakshyamritam ritavridho yagyam deveshu pisprishah

15.19

व॒यमु॑ त्वा गृहपते जनाना॒मग्ने॒ अक॑र्म स॒मिधा॑ बृ॒हन्त॑म् ।
अ॒स्थू॒रि नो॒ गार्ह॑पत्यानि सन्तु ति॒ग्मेन॑ न॒स्तेज॑सा॒ सं शि॑शाधि ॥१९॥

Vayamu tva grihapate jananamagne akarma samidha brihantam
Asthuri no garhapatyani santu tigmena nastejasa sam shishadhi