সূক্ত 8

8.1

৭ ইষ আত্রেয়ঃ। অগ্নিঃ। জগতী।

ত্বামগ্ন ঋতায়বঃ সমীধিরে প্রত্নং প্রত্নাস ঊতয়ে সহস্কৃত ।
পুরুশ্চন্দ্রং যজতং বিশ্বধায়সং দমূনসং গৃহপতিং বরেণ্যম্ ॥১॥

8.2

ত্বামগ্নে অতিথিং পূর্ব্যং বিশঃ শোচিষ্কেশং গৃহপতিং নি ষেদিরে ।
বৃহত্কেতুং পুরুরূপং ধনস্পৃতং সুশর্মাণং স্ববসং জরদ্বিষম্ ॥২॥

8.3

ত্বামগ্নে মানুষীরীলতে বিশো হোত্রাবিদং বিবিচিং রত্নধাতমম্ ।
গুহা সন্তং সুভগ বিশ্বদর্শতং তুবিষ্বণসং সুয়জং ঘৃতশ্রিয়ম্ ॥৩॥

8.4

ত্বামগ্নে ধর্ণসিং বিশ্বধা বয়ং গীর্ভির্গৃণন্তো নমসোপ সেদিম ।
স নো জুষস্ব সমিধানো অঙ্গিরো দেবো মর্তস্য যশসা সুদীতিভিঃ ॥৪॥

8.5

ত্বমগ্নে পুরুরূপো বিশেবিশে বয়ো দধাসি প্রত্নথা পুরুষ্টুত ।
পুরূণ্যন্না সহসা বি রাজসি ত্বিষিঃ সা তে তিত্বিষাণস্য নাধৃষে ॥৫॥

8.6

ত্বামগ্নে সমিধানং যবিষ্ঠ্য দেবা দূতং চক্রিরে হব্যবাহনম্ ।
উরুজ্রয়সং ঘৃতয়োনিমাহুতং ত্বেষং চক্ষুর্দধিরে চোদয়ন্মতি ॥৬॥

8.7

ত্বামগ্নে প্রদিব আহুতং ঘৃতৈঃ সুম্নায়বঃ সুষমিধা সমীধিরে ।
স বাবৃধান ওষধীভিরুক্ষিতো৩ঽভি জ্রয়াংসি পার্থিবা বি তিষ্ঠসে ॥৭॥