সূক্ত 7

7.1

১০ ইষ আত্রেয়ঃ। অগ্নিঃ। অনুষ্টুপ্, ১০ পংক্তিঃ।

সখায়ঃ সং বঃ সম্যঞ্চমিষং স্তোমং চাগ্নয়ে ।
বর্ষিষ্ঠায় ক্ষিতীনামূর্জো নপ্ত্রে সহস্বতে ॥১॥

কুত্রা চিদ্ যস্য সমৃতৌ রণ্বা নরো নৃষদনে ।
অর্হন্তশ্চিদ্ যমিন্ধতে সংজনয়ন্তি জন্তবঃ ॥২॥

সং যদিষো বনামহে সং হব্যা মানুষাণাম্ ।
উত দ্যুম্নস্য শবস ঋতস্য রশ্মিমা দদে ॥৩॥

সঃ স্মা কৃণোতি কেতুমা নক্তং চিদ্ দূর আ সতে ।
পাবকো যদ্ বনস্পতীন্ প্র স্মা মিনাত্যজরঃ ॥৪॥

অব স্ম যস্য বেষণে স্বেদং পথিষু জুহ্বতি ।
অভীমহ স্বজেন্যং ভূমা পৃষ্ঠেব রুরুহুঃ ॥৫॥

যং মর্ত্যঃ পুরুস্পৃহং বিদদ্ বিশ্বস্য ধায়সে ।
প্র স্বাদনং পিতূনামস্ততাতিং চিদায়বে ॥৬॥

স হি ষ্মা ধন্বাক্ষিতং দাতা ন দাত্যা পশুঃ ।
হিরিশ্মশ্রুঃ শুচিদন্নৃভুরনিভৃষ্টতবিষিঃ ॥৭॥

শুচিঃ ষ্ম যস্মা অত্রিবৎ প্র স্বধিতীব রীয়তে ।
সুষূরসূত মাতা ক্রাণা যদানশে ভগম্ ॥৮॥

আ যস্তে সর্পিরাসুতেঽগ্নে শমস্তি ধায়সে ।
ঐষু দ্যুম্নমুত শ্রব আ চিত্তং মর্ত্যেষু ধাঃ ॥৯॥

ইতি চিন্মন্যুমধ্রিজস্ত্বাদাতমা পশুং দদে ।
আদগ্নে অপৃণতোঽত্রিঃ সাসহ্যাদ্ দস্যূনিষঃ সাসহ্যান্নৄন্ ॥১০॥