Sukta 8

8.1

7 isha atreyah, agnih, jagati

त्वाम॑ग्न ऋता॒यव॒ः समी॑धिरे प्र॒त्नं प्र॒त्नास॑ ऊ॒तये॑ सहस्कृत ।
पु॒रु॒श्च॒न्द्रं य॑ज॒तं वि॒श्वधा॑यसं॒ दमू॑नसं गृ॒हप॑तिं॒ वरे॑ण्यम् ॥१॥

Tvamagna ritayavah samidhire pratnam pratnasa utaye sahaskrita
Purushchandram yajatam vishvadhayasam damunasam grihapatim varenyam

8.2

त्वाम॑ग्ने॒ अति॑थिं पू॒र्व्यं विश॑ः शो॒चिष्के॑शं गृ॒हप॑तिं॒ नि षे॑दिरे ।
बृ॒हत्के॑तुं पुरु॒रूपं॑ धन॒स्पृतं॑ सु॒शर्मा॑णं॒ स्वव॑सं जर॒द्विष॑म् ॥२॥

Tvamagne atithim purvyam vishah shochishkesham grihapatim ni shedire
Brihatketum pururupam dhanaspritam susharmanam svavasam jaradvisham

8.3

त्वाम॑ग्ने॒ मानु॑षीरीळते॒ विशो॑ होत्रा॒विदं॒ विवि॑चिं रत्न॒धात॑मम् ।
गुहा॒ सन्तं॑ सुभग वि॒श्वद॑र्शतं तुविष्व॒णसं॑ सु॒यजं॑ घृत॒श्रिय॑म् ॥३॥

Tvamagne manushirilate visho hotravidam vivichim ratnadhatamam
Guha santam subhaga vishvadarshatam tuvishvanasam suyajam ghritashriyam

8.4

त्वाम॑ग्ने धर्ण॒सिं वि॒श्वधा॑ व॒यं गी॒र्भिर्गृ॒णन्तो॒ नम॒सोप॑ सेदिम ।
स नो॑ जुषस्व समिधा॒नो अ॑ङ्गिरो दे॒वो मर्त॑स्य य॒शसा॑ सुदी॒तिभि॑ः ॥४॥

Tvamagne dharnasim vishvadha vayam girbhirgrinanto namasopa sedima
Sa no jushasva samidhano angiro devo martasya yashasa suditibhih

8.5

त्वम॑ग्ने पुरु॒रूपो॑ वि॒शेवि॑शे॒ वयो॑ दधासि प्र॒त्नथा॑ पुरुष्टुत ।
पु॒रूण्यन्ना॒ सह॑सा॒ वि रा॑जसि॒ त्विषि॒ः सा ते॑ तित्विषा॒णस्य॒ नाधृषे॑ ॥५॥

Tvamagne pururupo vishevishe vayo dadhasi pratnatha purushtuta
Purunyanna sahasa vi rajasi tvishih sa te titvishanasya nadhrishe

8.6

त्वाम॑ग्ने समिधा॒नं य॑विष्ठ्य दे॒वा दू॒तं च॑क्रिरे हव्य॒वाह॑नम् ।
उ॒रु॒ज्रय॑सं घृ॒तयो॑नि॒माहु॑तं त्वे॒षं चक्षु॑र्दधिरे चोद॒यन्म॑ति ॥६॥

Tvamagne samidhanam yavishthya deva dutam chakrire havyavahanam
Urujrayasam ghritayonimahutam tvesham chakshurdadhire chodayanmati

8.7

त्वाम॑ग्ने प्र॒दिव॒ आहु॑तं घृ॒तैः सु॑म्ना॒यव॑ः सुष॒मिधा॒ समी॑धिरे ।
स वा॑वृधा॒न ओष॑धीभिरुक्षि॒तो॒३ऽभि ज्रयां॑सि॒ पार्थि॑वा॒ वि ति॑ष्ठसे ॥७॥

Tvamagne pradiva ahutam ghritaih sumnayavah sushamidha samidhire
Sa vavridhana oshadhibhirukshito3bhi jrayansi parthiva vi tishthase