সূক্ত 79

79.1

১০ সত্যশ্রবা আত্রেয়ঃ। উষা। পঙ্ক্তিঃ।

মহে নো অদ্য বোধয়োষো রায়ে দিবিত্মতী ।
যথা চিন্নো অবোধয়ঃ সত্যশ্রবসি বায্যে সুজাতে অশ্বসূনৃতে ॥১॥

যা সুনীথে শৌচদ্রথে ব্যৌচ্ছো দুহিতর্দিবঃ ।
সা ব্যুচ্ছ সহীয়সি সত্যশ্রবসি বায্যে সুজাতে অশ্বসূনৃতে ॥২॥

সা নো অদ্যাভরদ্বসুর্ব্যুচ্ছা দুহিতর্দিবঃ ।
যো ব্যৌচ্ছঃ সহীয়সি সত্যশ্রবসি বায্যে সুজাতে অশ্বসূনৃতে ॥৩॥

অভি যে ত্বা বিভাবরি স্তোমৈর্গৃণন্তি বহ্নয়ঃ ।
মঘৈর্মঘোনি সুশ্রিয়ো দামন্বন্তঃ সুরাতয়ঃ সুজাত অশ্বসূনৃতে ॥৪॥

যচ্চিদ্ধি তে গণা ইমে ছদয়ন্তি মঘত্তয়ে ।
পরি চিদ্ বষ্টয়ো দধুর্দদতো রাধো অহ্রয়ং সুজাতে অশ্বসূনৃতে ॥৫॥

ঐষু ধা বীরবদ্ যশ উষো মঘোনি সূরিষু ।
যে নো রাধাংস্যহ্রয়া মঘবানো অরাসত সুজাতে অশ্বসূনৃতে ॥৬॥

তেভ্যো দ্যুম্নং বৃহদ্ যশ উষো মঘোন্যা বহ ।
যে নো রাধাংস্যশ্ব্যা গব্যা ভজন্ত সূরয়ঃ সুজাতে অশ্বসূনৃতে ॥৭॥

উত নো গোমতীরিষ আ বহা দুহিতর্দিবঃ ।
সাকং সূর্যস্য রশ্মিভিঃ শুক্রৈঃ শোচদ্ভিরর্চিভিঃ সুজাতে অশ্বসূনৃতে ॥৮॥

ব্যুচ্ছা দুহিতর্দিবো মা চিরং তনুথা অপঃ ।
নেৎ ত্বা স্তেনং যথা রিপুং তপাতি সূরো অর্চিষা সুজাতে অশ্বসূনৃতে ॥৯॥

এতাবদ্ বেদুষস্ত্বং ভূয়ো বা দাতুমর্হসি ।
যা স্তোতৃভ্যো বিভাবর্যুচ্ছন্তী ন প্রমীয়সে সুজাতে অশ্বসূনৃতে ॥১০॥