Sukta 79

79.1

10 satyashrava atreyah, usha, panktih

म॒हे नो॑ अ॒द्य बो॑ध॒योषो॑ रा॒ये दि॒वित्म॑ती ।
यथा॑ चिन्नो॒ अबो॑धयः स॒त्यश्र॑वसि वा॒य्ये सुजा॑ते॒ अश्व॑सूनृते ॥१॥

Mahe no adya bodhayosho raye divitmati
Yatha chinno abodhayah satyashravasi vayye sujate ashvasunrite

या सु॑नी॒थे शौ॑चद्र॒थे व्यौच्छो॑ दुहितर्दिवः ।
सा व्यु॑च्छ॒ सही॑यसि स॒त्यश्र॑वसि वा॒य्ये सुजा॑ते॒ अश्व॑सूनृते ॥२॥

Ya sunithe shauchadrathe vyauchchho duhitardivah
Sa vyuchchha sahiyasi satyashravasi vayye sujate ashvasunrite

सा नो॑ अ॒द्याभ॒रद्व॑सु॒र्व्यु॑च्छा दुहितर्दिवः ।
यो व्यौच्छ॒ः सही॑यसि स॒त्यश्र॑वसि वा॒य्ये सुजा॑ते॒ अश्व॑सूनृते ॥३॥

Sa no adyabharadvasurvyuchchha duhitardivah
Yo vyauchchhah sahiyasi satyashravasi vayye sujate ashvasunrite

अ॒भि ये त्वा॑ विभावरि॒ स्तोमै॑र्गृ॒णन्ति॒ वह्न॑यः ।
म॒घैर्म॑घोनि सु॒श्रियो॒ दाम॑न्वन्तः सुरा॒तय॒ः सुजा॑त॒॑ अश्व॑सूनृते ॥४॥

Abhi ye tva vibhavari stomairgrinanti vahnayah
Maghairmaghoni sushriyo damanvantah suratayah sujata ashvasunrite

यच्चि॒द्धि ते॑ ग॒णा इ॒मे छ॒दय॑न्ति म॒घत्त॑ये ।
परि॑ चि॒द् वष्ट॑यो दधु॒र्दद॑तो॒ राधो॒ अह्र॑यं॒ सुजा॑ते॒ अश्व॑सूनृते ॥५॥

Yachchiddhi te gana ime chhadayanti maghattaye
Pari chid vashtayo dadhurdadato radho ahrayam sujate ashvasunrite

ऐषु॑ धा वी॒रव॒द् यश॒ उषो॑ मघोनि सू॒रिषु॑ ।
ये नो॒ राधां॒स्यह्र॑या म॒घवा॑नो॒ अरा॑सत॒ सुजा॑ते॒ अश्व॑सूनृते ॥६॥

Aishu dha viravad yasha usho maghoni surishu
Ye no radhansyahraya maghavano arasata sujate ashvasunrite

तेभ्यो॑ द्यु॒म्नं बृ॒हद् यश॒ उषो॑ मघो॒न्या व॑ह ।
ये नो॒ राधां॒स्यश्व्या॑ ग॒व्या भज॑न्त सू॒रय॒ः सुजा॑ते॒ अश्व॑सूनृते ॥७॥

Tebhyo dyumnam brihad yasha usho maghonya vaha
Ye no radhansyashvya gavya bhajanta surayah sujate ashvasunrite

उ॒त नो॒ गोम॑ती॒रिष॒ आ व॑हा दुहितर्दिवः ।
सा॒कं सूर्य॑स्य र॒श्मिभि॑ः शु॒क्रैः शोच॑द्भिर॒र्चिभि॒ः सुजा॑ते॒ अश्व॑सूनृते ॥८॥

Uta no gomatirisha a vaha duhitardivah
Sakam suryasya rashmibhih shukraih shochadbhirarchibhih sujate ashvasunrite

व्यु॑च्छा दुहितर्दिवो॒ मा चि॒रं त॑नुथा॒ अप॑ः ।
नेत् त्वा॑ स्ते॒नं यथा॑ रि॒पुं तपा॑ति॒ सूरो॑ अ॒र्चिषा॒ सुजा॑ते॒ अश्व॑सूनृते ॥९॥

Vyuchchha duhitardivo ma chiram tanutha apah
Net tva stenam yatha ripum tapati suro archisha sujate ashvasunrite

ए॒ताव॒द् वेदु॑ष॒स्त्वं भूयो॑ वा॒ दातु॑मर्हसि ।
या स्तो॒तृभ्यो॑ विभावर्यु॒च्छन्ती॒ न प्र॒मीय॑से॒ सुजा॑ते॒ अश्व॑सूनृते ॥१०॥

Etavad vedushastvam bhuyo va datumarhasi
Ya stotribhyo vibhavaryuchchhanti na pramiyase sujate ashvasunrite