Sukta 80

80.1

6 satyashrava atreyah, usha, trishtup

द्यु॒तद्या॑मानं बृह॒तीमृ॒तेन॑ ऋ॒ताव॑रीमरु॒णप्सुं॑ विभा॒तीम् ।
दे॒वीमु॒षसं॒ स्व॑रा॒वह॑न्तीं॒ प्रति॒ विप्रा॑सो म॒तिभि॑र्जरन्ते ॥१॥

Dyutadyamanam brihatimritena ritavarimarunapsum vibhatim
Devimushasam svaravahantim prati vipraso matibhirjarante

ए॒षा जनं॑ दर्श॒ता बो॒धय॑न्ती सु॒गान् प॒थः कृ॑ण्व॒ती या॒त्यग्रे॑ ।
बृ॒ह॒द्र॒था बृ॑ह॒ती वि॑श्वमि॒न्वोषा ज्योति॑र्यच्छ॒त्यग्रे॒ अह्ना॑म् ॥२॥

Esha janam darshata bodhayanti sugan pathah krinvati yatyagre
Brihadratha brihati vishvaminvosha jyotiryachchhatyagre ahnam

ए॒षा गोभि॑ररु॒णेभि॑र्युजा॒ना ऽस्रे॑धन्ती र॒यिमप्रा॑यु चक्रे ।
प॒थो रद॑न्ती सुवि॒ताय॑ दे॒वी पु॑रुष्टु॒ता वि॒श्ववा॑रा॒ वि भा॑ति ॥३॥

Esha gobhirarunebhiryujana sredhanti rayimaprayu chakre
Patho radanti suvitaya devi purushtuta vishvavara vi bhati

ए॒षा व्ये॑नी भवति द्वि॒बर्हा॑ आविष्कृण्वा॒ना त॒न्वं॑ पु॒रस्ता॑त् ।
ऋ॒तस्य॒ पन्था॒मन्वे॑ति सा॒धु प्र॑जान॒तीव॒ न दिशो॑ मिनाति ॥४॥

Esha vyeni bhavati dvibarha avishkrinvana tanvam purastat
Ritasya panthamanveti sadhu prajanativa na disho minati

ए॒षा शु॒भ्रा न त॒न्वो॑ विदा॒नोर्ध्वेव॑ स्ना॒ती दृ॒शये॑ नो अस्थात् ।
अप॒ द्वेषो॒ बाध॑माना॒ तमां॑स्यु॒षा दि॒वो दु॑हि॒ता ज्योति॒षागा॑त् ॥५॥

Esha shubhra na tanvo vidanordhveva snati drishaye no asthat
Apa dvesho badhamana tamansyusha divo duhita jyotishagat

ए॒षा प्र॑ती॒ची दु॑हि॒ता दि॒वो नॄन् योषे॑व भ॒द्रा नि रि॑णीते॒ अप्स॑ः ।
व्यू॒र्ण्व॒ती दा॒शुषे॒ वार्या॑णि॒ पुन॒र्ज्योति॑र्युव॒तिः पू॒र्वथा॑कः ॥६॥

Esha pratichi duhita divo nrin yosheva bhadra ni rinite apsah
Vyurnvati dashushe varyani punarjyotiryuvatih purvathakah