Sukta 81

81.1

5 shyavashva atreyah, savita, jagati

यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑ः ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ॥१॥

Yunjate mana uta yunjate dhiyo vipra viprasya brihato vipashchitah
Vi hotra dadhe vayunavideka inmahi devasya savituh parishtutih

81.2

विश्वा॑ रू॒पाणि॒ प्रति॑ मुञ्चते क॒विः प्रासा॑वीद् भ॒द्रं द्वि॒पदे॒ चतु॑ष्पदे ।
वि नाक॑मख्यत् सवि॒ता वरे॒ण्योऽनु॑ प्र॒याण॑मु॒षसो॒ वि रा॑जति ॥२॥

Vishva rupani prati munchate kavih prasavid bhadram dvipade chatushpade
Vi nakamakhyat savita varenyonu prayanamushaso vi rajati

81.3

यस्य॑ प्र॒याण॒मन्व॒न्य इद् य॒युर्दे॒वा दे॒वस्य॑ महि॒मान॒मोज॑सा ।
यः पार्थि॑वानि विम॒मे स एत॑शो॒ रजां॑सि दे॒वः स॑वि॒ता म॑हित्व॒ना ॥३॥

Yasya prayanamanvanya id yayurdeva devasya mahimanamojasa
Yah parthivani vimame sa etasho rajansi devah savita mahitvana

81.4

उ॒त या॑सि सवित॒स्त्रीणि॑ रोच॒नोत सूर्य॑स्य र॒श्मिभि॒ः समु॑च्यसि ।
उ॒त रात्री॑मुभ॒यत॒ः परी॑यस उ॒त मि॒त्रो भ॑वसि देव॒ धर्म॑भिः ॥४॥

Uta yasi savitastrini rochanota suryasya rashmibhih samuchyasi
Uta ratrimubhayatah pariyasa uta mitro bhavasi deva dharmabhih

81.5

उ॒तेशि॑षे प्रस॒वस्य॒ त्वमेक॒ इदु॒त पू॒षा भ॑वसि देव॒ याम॑भिः ।
उ॒तेदं विश्वं॒ भुव॑नं॒ वि रा॑जसि श्या॒वाश्व॑स्ते सवित॒ स्तोम॑मानशे ॥५॥

Uteshishe prasavasya tvameka iduta pusha bhavasi deva yamabhih
Utedam vishvam bhuvanam vi rajasi shyavashvaste savita stomamanashe