Sukta 78

78.1

9 saptavadhriratreyah, ashvinau(5-9 garbhasravinyupanishad), anushtup, 1-3 ushnik, 4 trishtup

अश्वि॑ना॒वेह ग॑च्छतं॒ नास॑त्या॒ मा वि वे॑नतम् । हं॒सावि॑व पतत॒मा सु॒ताँ उप॑ ॥१॥

Ashvinaveha gachchhatam nasatya ma vi venatam, hansaviva patatama sutam upa

अश्वि॑ना हरि॒णावि॑व गौ॒रावि॒वानु॒ यव॑सम् । हं॒सावि॑व पतत॒मा सु॒ताँ उप॑ ॥२॥

Ashvina harinaviva gauravivanu yavasam, hansaviva patatama sutam upa

अश्वि॑ना वाजिनीवसू जु॒षेथां॑ य॒ज्ञमि॒ष्टये॑ । हं॒सावि॑व पतत॒मा सु॒ताँ उप॑ ॥३॥

Ashvina vajinivasu jushetham yagyamishtaye, hansaviva patatama sutam upa

अत्रि॒र्यद् वा॑मव॒रोह॑न्नृ॒बीस॒मजो॑हवी॒न्नाध॑मानेव॒ योषा॑ ।
श्ये॒नस्य॑ चि॒ज्जव॑सा॒ नूत॑ने॒ना ऽऽग॑च्छतमश्विना॒ शंत॑मेन ॥४॥

Atriryad vamavarohannribisamajohavinnadhamaneva yosha
Shyenasya chijjavasa nutanena gachchhatamashvina shantamena

वि जि॑हीष्व वनस्पते॒ योनि॒ः सूष्य॑न्त्या इव । श्रु॒तं मे॑ अश्विना॒ हवं॑ स॒प्तव॑ध्रिं च मुञ्चतम् ॥५॥

Vi jihishva vanaspate yonih sushyantya iva, shrutam me ashvina havam saptavadhrim cha munchatam

भी॒ताय॒ नाध॑मानाय॒ ऋष॑ये स॒प्तव॑ध्रये । मा॒याभि॑रश्विना यु॒वं वृ॒क्षं सं च॒ वि चा॑चथः ॥६॥

Bhitaya nadhamanaya rishaye saptavadhraye, mayabhirashvina yuvam vriksham sam cha vi chachathah

यथा॒ वात॑ः पुष्क॒रिणीं॑ समि॒ङ्गय॑ति स॒र्वत॑ः । ए॒वा ते॒ गर्भ॑ एजतु नि॒रैतु॒ दश॑मास्यः ॥७॥

Yatha vatah pushkarinim samingayati sarvatah, eva te garbha ejatu niraitu dashamasyah

यथा॒ वातो॒ यथा॒ वनं॒ यथा॑ समु॒द्र एज॑ति । ए॒वा त्वं द॑शमास्य स॒हावे॑हि ज॒रायु॑णा ॥८॥

Yatha vato yatha vanam yatha samudra ejati, eva tvam dashamasya sahavehi jarayuna

दश॒ मासा॑ञ्छशया॒नः कु॑मा॒रो अधि॑ मा॒तरि॑ । नि॒रैतु॑ जी॒वो अक्ष॑तो जी॒वो जीव॑न्त्या॒ अधि॑ ॥९॥

Dasha masanchhashayanah kumaro adhi matari, niraitu jivo akshato jivo jivantya adhi