সূক্ত 57

57.1

৮ শ্যাবাশ্ব আত্রেয়ঃ। মরুতঃ। জগতী, ৭-৮ ত্রিষ্টুপ্।

আ রুদ্রাস ইন্দ্রবন্তঃ সজোষসো হিরণ্যরথাঃ সুবিতায় গন্তন ।
ইয়ং বো অস্মৎ প্রতি হর্যতে মতিস্তৃষ্ণজে ন দিব উত্সা উদন্যবে ॥১॥

57.2

বাশীমন্ত ঋষ্টিমন্তো মনীষিণঃ সুধন্বান ইষুমন্তো নিষঙ্গিণঃ ।
স্বশ্বাঃ স্থ সুরথাঃ পৃশ্নিমাতরঃ স্বায়ুধা মরুতো যাথনা শুভম্ ॥২॥

57.3

ধূনুথ দ্যাং পর্বতান্ দাশুষে বসু নি বো বনা জিহতে যামনো ভিয়া ।
কোপয়থ পৃথিবীং পৃশ্নিমাতরঃ শুভে যদুগ্রাঃ পৃষতীরয়ুগ্ধ্বম্ ॥৩॥

57.4

বাতত্বিষো মরুতো বর্ষনির্ণিজো যমা ইব সুসদৃশঃ সুপেশসঃ ।
পিশঙ্গাশ্বা অরুণাশ্বা অরেপসঃ প্রত্বক্ষসো মহিনা দ্যৌরিবোরবঃ ॥৪॥

57.5

পুরুদ্রপ্সা অঞ্জিমন্তঃ সুদানবস্ত্বেষসংদৃশো অনবভ্ররাধসঃ ।
সুজাতাসো জনুষা রুক্মবক্ষসো দিবো অর্কা অমৃতং নাম ভেজিরে ॥৫॥

57.6

ঋষ্টয়ো বো মরুতো অংসয়োরধি সহ ওজো বাহ্বোর্বো বলং হিতম্ ।
নৃম্ণা শীর্ষস্বায়ুধা রথেষু বো বিশ্বা বঃ শ্রীরধি তনূষু পিপিশে ॥৬॥

57.7

গোমদশ্বাবদ্ রথবৎ সুবীরং চন্দ্রবদ্ রাধো মরুতো দদা নঃ ।
প্রশস্তিং নঃ কৃণুত রুদ্রিয়াসো ভক্ষীয় বোঽবসো দৈব্যস্য ॥৭॥

57.8

হয়ে নরো মরুতো মৃলতা নস্তুবীমঘাসো অমৃতা ঋতজ্ঞাঃ ।
সত্যশ্রুতঃ কবয়ো যুবানো বৃহদ্গিরয়ো বৃহদুক্ষমাণাঃ ॥৮॥