Sukta 57

57.1

8 shyavashva atreyah, marutah, jagati, 7-8 trishtup

आ रु॑द्रास॒ इन्द्र॑वन्तः स॒जोष॑सो॒ हिर॑ण्यरथाः सुवि॒ताय॑ गन्तन ।
इ॒यं वो॑ अ॒स्मत् प्रति॑ हर्यते म॒तिस्तृ॒ष्णजे॒ न दि॒व उत्सा॑ उद॒न्यवे॑ ॥१॥

A rudrasa indravantah sajoshaso hiranyarathah suvitaya gantana
Iyam vo asmat prati haryate matistrishnaje na diva utsa udanyave

57.2

वाशी॑मन्त ऋष्टि॒मन्तो॑ मनी॒षिण॑ः सु॒धन्वा॑न॒ इषु॑मन्तो निष॒ङ्गिण॑ः ।
स्वश्वा॑ः स्थ सु॒रथा॑ः पृश्निमातरः स्वायु॒धा म॑रुतो याथना॒ शुभ॑म् ॥२॥

Vashimanta rishtimanto manishinah sudhanvana ishumanto nishanginah
Svashvah stha surathah prishnimatarah svayudha maruto yathana shubham

57.3

धू॒नु॒थ द्यां पर्व॑तान् दा॒शुषे॒ वसु॒ नि वो॒ वना॑ जिहते॒ याम॑नो भि॒या ।
को॒पय॑थ पृथि॒वीं पृ॑श्निमातरः शु॒भे यदु॑ग्रा॒ः पृष॑ती॒रयु॑ग्ध्वम् ॥३॥

Dhunutha dyam parvatan dashushe vasu ni vo vana jihate yamano bhiya
Kopayatha prithivim prishnimatarah shubhe yadugrah prishatirayugdhvam

57.4

वात॑त्विषो म॒रुतो॑ व॒र्षनि॑र्णिजो य॒मा इ॑व॒ सुस॑दृशः सु॒पेश॑सः ।
पि॒शङ्गा॑श्वा अरु॒णाश्वा॑ अरे॒पस॒ः प्रत्व॑क्षसो महि॒ना द्यौरि॑वो॒रव॑ः ॥४॥

Vatatvisho maruto varshanirnijo yama iva susadrishah supeshasah
Pishangashva arunashva arepasah pratvakshaso mahina dyaurivoravah

57.5

पु॒रु॒द्र॒प्सा अ॑ञ्जि॒मन्त॑ः सु॒दान॑वस्त्वे॒षसं॑दृशो अनव॒भ्ररा॑धसः ।
सु॒जा॒तासो॑ ज॒नुषा॑ रु॒क्मव॑क्षसो दि॒वो अ॒र्का अ॒मृतं॒ नाम॑ भेजिरे ॥५॥

Purudrapsa anjimantah sudanavastveshasandrisho anavabhraradhasah
Sujataso janusha rukmavakshaso divo arka amritam nama bhejire

57.6

ऋ॒ष्टयो॑ वो मरुतो॒ अंस॑यो॒रधि॒ सह॒ ओजो॑ बा॒ह्वोर्वो॒ बलं॑ हि॒तम् ।
नृ॒म्णा शी॒र्षस्वायु॑धा॒ रथे॑षु वो॒ विश्वा॑ व॒ः श्रीरधि॑ त॒नूषु॑ पिपिशे ॥६॥

Rishtayo vo maruto ansayoradhi saha ojo bahvorvo balam hitam
Nrimna shirshasvayudha ratheshu vo vishva vah shriradhi tanushu pipishe

57.7

गोम॒दश्वा॑व॒द् रथ॑वत् सु॒वीरं॑ च॒न्द्रव॒द् राधो॑ मरुतो ददा नः ।
प्रश॑स्तिं नः कृणुत रुद्रियासो भक्षी॒य वोऽव॑सो॒ दैव्य॑स्य ॥७॥

Gomadashvavad rathavat suviram chandravad radho maruto dada nah
Prashastim nah krinuta rudriyaso bhakshiya vovaso daivyasya

57.8

ह॒ये नरो॒ मरु॑तो मृ॒ळता॑ न॒स्तुवी॑मघासो॒ अमृ॑ता॒ ऋत॑ज्ञाः ।
सत्य॑श्रुत॒ः कव॑यो॒ युवा॑नो॒ बृह॑द्गिरयो बृ॒हदु॒क्षमा॑णाः ॥८॥

Haye naro maruto mrilata nastuvimaghaso amrita ritagyah
Satyashrutah kavayo yuvano brihadgirayo brihadukshamanah