Sukta 56

56.1

9 shyavashva atreyah, marutah, brihati, 3, 7 satobrihati

अग्ने॒ शर्ध॑न्त॒मा ग॒णं पि॒ष्टं रु॒क्मेभि॑र॒ञ्जिभि॑ः ।
विशो॑ अ॒द्य म॒रुता॒मव॑ ह्वये दि॒वश्चि॑द् रोच॒नादधि॑ ॥१॥

Agne shardhantama ganam pishtam rukmebhiranjibhih
Visho adya marutamava hvaye divashchid rochanadadhi

56.2

यथा॑ चि॒न्मन्य॑से हृ॒दा तदिन्मे॑ जग्मुरा॒शस॑ः ।
ये ते॒ नेदि॑ष्ठं॒ हव॑नान्या॒गम॒न् तान् व॑र्ध भी॒मसं॑दृशः ॥२॥

Yatha chinmanyase hrida tadinme jagmurashasah
Ye te nedishtham havananyagaman tan vardha bhimasandrishah

56.3

मी॒ळहुष्म॑तीव पृथि॒वी परा॑हता॒ मद॑न्त्येत्य॒स्मदा ।
ऋक्षो॒ न वो॑ मरुत॒ः शिमी॑वाँ॒ अमो॑ दु॒ध्रो गौरि॑व भीम॒युः ॥३॥

Milahushmativa prithivi parahata madantyetyasmada
Riksho na vo marutah shimivam amo dudhro gauriva bhimayuh

56.4

नि ये रि॒णन्त्योज॑सा॒ वृथा॒ गावो॒ न दु॒र्धुर॑ः ।
अश्मा॑नं चित् स्वर्यं१ पर्व॑तं गि॒रिं प्र च्या॑वयन्ति॒ याम॑भिः ॥४॥

Ni ye rinantyojasa vritha gavo na durdhurah
Ashmanam chit svaryan1 parvatam girim pra chyavayanti yamabhih

56.5

उत् ति॑ष्ठ नू॒नमे॑षां॒ स्तोमै॒ः समु॑क्षितानाम् ।
म॒रुतां॑ पुरु॒तम॒मपू॑र्व्यं॒ गवां॒ सर्ग॑मिव ह्वये ॥५॥

Ut tishtha nunamesham stomaih samukshitanam
Marutam purutamamapurvyam gavam sargamiva hvaye

56.6

यु॒ङ्ग्ध्वं ह्यरु॑षी॒ रथे॑ यु॒ङ्ग्ध्वं रथे॑षु रो॒हित॑ः ।
यु॒ङ्ग्ध्वं हरी॑ अजि॒रा धु॒रि वोळह॑वे॒ वहि॑ष्ठा धु॒रि वोळह॑वे ॥६॥

Yungdhvam hyarushi rathe yungdhvam ratheshu rohitah
Yungdhvam hari ajira dhuri volahave vahishtha dhuri volahave

56.7

उ॒त स्य वा॒ज्य॑रु॒षस्तु॑वि॒ष्वणि॑रि॒ह स्म॑ धायि दर्श॒तः ।
मा वो॒ यामे॑षु मरुतश्चि॒रं क॑र॒त् प्र तं रथे॑षु चोदत ॥७॥

Uta sya vajyarushastuvishvaniriha sma dhayi darshatah
Ma vo yameshu marutashchiram karat pra tam ratheshu chodata

56.8

रथं॒ नु मारु॑तं व॒यं श्र॑व॒स्युमा हु॑वामहे ।
आ यस्मि॑न् त॒स्थौ सु॒रणा॑नि॒ बिभ्र॑ती॒ सचा॑ म॒रुत्सु॑ रोद॒सी ॥८॥

Ratham nu marutam vayam shravasyuma huvamahe
A yasmin tasthau suranani bibhrati sacha marutsu rodasi

56.9

तं व॒ः शर्धं॑ रथे॒शुभं॑ त्वे॒षं प॑न॒स्युमा हु॑वे ।
यस्मि॒न् त्सुजा॑ता सु॒भगा॑ मही॒यते॒ सचा॑ म॒रुत्सु॑ मीळहु॒षी ॥९॥

Tam vah shardham ratheshubham tvesham panasyuma huve
Yasmin tsujata subhaga mahiyate sacha marutsu milahushi