Sukta 55

55.1

10 shyavashva atreyah, marutah, jagati, 10 trishtup

प्रय॑ज्यवो म॒रुतो॒ भ्राज॑दृष्टयो बृ॒हद् वयो॑ दधिरे रु॒क्मव॑क्षसः ।
ईय॑न्ते॒ अश्वै॑ः सु॒यमे॑भिरा॒शुभि॒ः शुभं॑ या॒तामनु॒ रथा॑ अवृत्सत ॥१॥

Prayajyavo maruto bhrajadrishtayo brihad vayo dadhire rukmavakshasah
Iyante ashvaih suyamebhirashubhih shubham yatamanu ratha avritsata

55.2

स्व॒यं द॑धिध्वे॒ तवि॑षीं॒ यथा॑ वि॒द बृ॒हन्म॑हान्त उर्वि॒या वि रा॑जथ ।
उ॒तान्तरि॑क्षं ममिरे॒ व्योज॑सा॒ शुभं॑ या॒तामनु॒ रथा॑ अवृत्सत ॥२॥

Svayam dadhidhve tavishim yatha vida brihanmahanta urviya vi rajatha
Utantariksham mamire vyojasa shubham yatamanu ratha avritsata

55.3

सा॒कं जा॒ताः सु॒भ्व॑ः सा॒कमु॑क्षि॒ताः श्रि॒ये चि॒दा प्र॑त॒रं वा॑वृधु॒र्नर॑ः ।
वि॒रो॒किण॒ः सूर्य॑स्येव र॒श्मय॒ः शुभं॑ या॒तामनु॒ रथा॑ अवृत्सत ॥३॥

Sakam jatah subhvah sakamukshitah shriye chida prataram vavridhurnarah
Virokinah suryasyeva rashmayah shubham yatamanu ratha avritsata

55.4

आ॒भू॒षेण्यं॑ वो मरुतो महित्व॒नं दि॑दृ॒क्षेण्यं॒ सूर्य॑स्येव॒ चक्ष॑णम् ।
उ॒तो अ॒स्माँ अ॑मृत॒त्वे द॑धातन॒ शुभं॑ या॒तामनु॒ रथा॑ अवृत्सत ॥४॥

Abhushenyam vo maruto mahitvanam didrikshenyam suryasyeva chakshanam
Uto asmam amritatve dadhatana shubham yatamanu ratha avritsata

55.5

उदी॑रयथा मरुतः समुद्र॒तो यू॒यं वृ॒ष्टिं व॑र्षयथा पुरीषिणः ।
न वो॑ दस्रा॒ उप॑ दस्यन्ति धे॒नव॒ः शुभं॑ या॒तामनु॒ रथा॑ अवृत्सत ॥५॥

Udirayatha marutah samudrato yuyam vrishtim varshayatha purishinah
Na vo dasra upa dasyanti dhenavah shubham yatamanu ratha avritsata

55.6

यदश्वा॑न् धू॒र्षु पृष॑ती॒रयु॑ग्ध्वं हिर॒ण्यया॒न् प्रत्यत्काँ॒ अमु॑ग्ध्वम् ।
विश्वा॒ इत् स्पृधो॑ मरुतो॒ व्य॑स्यथ॒ शुभं॑ या॒तामनु॒ रथा॑ अवृत्सत ॥६॥

Yadashvan dhurshu prishatirayugdhvam hiranyayan pratyatkam amugdhvam
Vishva it spridho maruto vyasyatha shubham yatamanu ratha avritsata

55.7

न पर्व॑ता॒ न न॒द्यो॑ वरन्त वो॒ यत्राचि॑ध्वं मरुतो॒ गच्छ॒थेदु॒ तत् ।
उ॒त द्यावा॑पृथि॒वी या॑थना॒ परि॒ शुभं॑ या॒तामनु॒ रथा॑ अवृत्सत ॥७॥

Na parvata na nadyo varanta vo yatrachidhvam maruto gachchhathedu tat
Uta dyavaprithivi yathana pari shubham yatamanu ratha avritsata

55.8

यत् पू॒र्व्यं म॑रुतो॒ यच्च॒ नूत॑नं॒ यदु॒द्यते॑ वसवो॒ यच्च॑ श॒स्यते॑ ।
विश्व॑स्य॒ तस्य॑ भवथा॒ नवे॑दस॒ः शुभं॑ या॒तामनु॒ रथा॑ अवृत्सत ॥८॥

Yat purvyam maruto yachcha nutanam yadudyate vasavo yachcha shasyate
Vishvasya tasya bhavatha navedasah shubham yatamanu ratha avritsata

55.9

मृ॒ळत॑ नो मरुतो॒ मा व॑धिष्टना॒ऽस्मभ्यं॒ शर्म॑ बहु॒लं वि य॑न्तन ।
अधि॑ स्तो॒त्रस्य॑ स॒ख्यस्य॑ गातन॒ शुभं॑ या॒तामनु॒ रथा॑ अवृत्सत ॥९॥

Mrilata no maruto ma vadhishtanasmabhyam sharma bahulam vi yantana
Adhi stotrasya sakhyasya gatana shubham yatamanu ratha avritsata

55.10

यू॒यम॒स्मान् न॑यत॒ वस्यो॒ अच्छा॒ निरं॑ह॒तिभ्यो॑ मरुतो गृणा॒नाः ।
जु॒षध्वं॑ नो ह॒व्यदा॑तिं यजत्रा व॒यं स्या॑म॒ पत॑यो रयी॒णाम् ॥१०॥

Yuyamasman nayata vasyo achchha niranhatibhyo maruto grinanah
Jushadhvam no havyadatim yajatra vayam syama patayo rayinam