সূক্ত 55

55.1

১০ শ্যাবাশ্ব আত্রেয়ঃ। মরুতঃ। জগতী, ১০ ত্রিষ্টুপ্ ।

প্রয়জ্যবো মরুতো ভ্রাজদৃষ্টয়ো বৃহদ্ বয়ো দধিরে রুক্মবক্ষসঃ ।
ঈয়ন্তে অশ্বৈঃ সুয়মেভিরাশুভিঃ শুভং যাতামনু রথা অবৃত্সত ॥১॥

স্বয়ং দধিধ্বে তবিষীং যথা বিদ বৃহন্মহান্ত উর্বিয়া বি রাজথ ।
উতান্তরিক্ষং মমিরে ব্যোজসা শুভং যাতামনু রথা অবৃত্সত ॥২॥

সাকং জাতাঃ সুভ্বঃ সাকমুক্ষিতাঃ শ্রিয়ে চিদা প্রতরং বাবৃধুর্নরঃ ।
বিরোকিণঃ সূর্যস্যেব রশ্ময়ঃ শুভং যাতামনু রথা অবৃত্সত ॥৩॥

আভূষেণ্যং বো মরুতো মহিত্বনং দিদৃক্ষেণ্যং সূর্যস্যেব চক্ষণম্ ।
উতো অস্মাঁ অমৃতত্বে দধাতন শুভং যাতামনু রথা অবৃত্সত ॥৪॥

উদীরয়থা মরুতঃ সমুদ্রতো যূয়ং বৃষ্টিং বর্ষয়থা পুরীষিণঃ ।
ন বো দস্রা উপ দস্যন্তি ধেনবঃ শুভং যাতামনু রথা অবৃত্সত ॥৫॥

যদশ্বান্ ধূর্ষু পৃষতীরয়ুগ্ধ্বং হিরণ্যয়ান্ প্রত্যত্কাঁ অমুগ্ধ্বম্ ।
বিশ্বা ইৎ স্পৃধো মরুতো ব্যস্যথ শুভং যাতামনু রথা অবৃত্সত ॥৬॥

ন পর্বতা ন নদ্যো বরন্ত বো যত্রাচিধ্বং মরুতো গচ্ছথেদু তৎ ।
উত দ্যাবাপৃথিবী যাথনা পরি শুভং যাতামনু রথা অবৃত্সত ॥৭॥

যৎ পূর্ব্যং মরুতো যচ্চ নূতনং যদুদ্যতে বসবো যচ্চ শস্যতে ।
বিশ্বস্য তস্য ভবথা নবেদসঃ শুভং যাতামনু রথা অবৃত্সত ॥৮॥

মৃলত নো মরুতো মা বধিষ্টনাঽস্মভ্যং শর্ম বহুলং বি যন্তন ।
অধি স্তোত্রস্য সখ্যস্য গাতন শুভং যাতামনু রথা অবৃত্সত ॥৯॥

যূয়মস্মান্ নয়ত বস্যো অচ্ছা নিরংহতিভ্যো মরুতো গৃণানাঃ ।
জুষধ্বং নো হব্যদাতিং যজত্রা বয়ং স্যাম পতয়ো রয়ীণাম্ ॥১০॥