Sukta 54

54.1

15 shyavashva atreyah, marutah, jagati, 14 trishtup

प्र शर्धा॑य॒ मारु॑ताय॒ स्वभा॑नव इ॒मां वाच॑मनजा पर्वत॒च्युते॑ ।
घ॒र्म॒स्तुभे॑ दि॒व आ पृ॑ष्ठ॒यज्व॑ने द्यु॒म्नश्र॑वसे॒ महि॑ नृ॒म्णम॑र्चत ॥१॥

Pra shardhaya marutaya svabhanava imam vachamanaja parvatachyute
Gharmastubhe diva a prishthayajvane dyumnashravase mahi nrimnamarchata

54.2

प्र वो॑ मरुतस्तवि॒षा उ॑द॒न्यवो॑ वयो॒वृधो॑ अश्व॒युज॒ः परि॑ज्रयः ।
सं वि॒द्युता॒ दध॑ति॒ वाश॑ति त्रि॒तः स्वर॒न्त्यापो॒ऽवना॒ परि॑ज्रयः ॥२॥

Pra vo marutastavisha udanyavo vayovridho ashvayujah parijrayah
Sam vidyuta dadhati vashati tritah svarantyapovana parijrayah

54.3

वि॒द्युन्म॑हसो॒ नरो॒ अश्म॑दिद्यवो॒ वात॑त्विषो म॒रुत॑ः पर्वत॒च्युत॑ः ।
अ॒ब्द॒या चि॒न्मुहु॒रा ह्रा॑दुनी॒वृत॑ः स्त॒नय॑दमा रभ॒सा उदो॑जसः ॥३॥

Vidyunmahaso naro ashmadidyavo vatatvisho marutah parvatachyutah
Abdaya chinmuhura hradunivritah stanayadama rabhasa udojasah

54.4

व्य१क्तून् रु॑द्रा॒ व्यहा॑नि शिक्वसो॒ व्य१न्तरि॑क्षं॒ वि रजां॑सि धूतयः ।
वि यदज्राँ॒ अज॑थ॒ नाव॑ ईं यथा॒ वि दु॒र्गाणि॑ मरुतो॒ नाह॑ रिष्यथ ॥४॥

Vya1ktun rudra vyahani shikvaso vya1ntariksham vi rajansi dhutayah
Vi yadajram ajatha nava im yatha vi durgani maruto naha rishyatha

54.5

तद् वी॒र्यं॑ वो मरुतो महित्व॒नं दी॒र्घं त॑तान॒ सूर्यो॒ न योज॑नम् ।
एता॒ न यामे॒ अगृ॑भीतशोचि॒षोऽन॑श्वदां॒ यन्न्यया॑तना गि॒रिम् ॥५॥

Tad viryam vo maruto mahitvanam dirgham tatana suryo na yojanam
Eta na yame agribhitashochishonashvadam yannyayatana girim

54.6

अभ्रा॑जि॒ शर्धो॑ मरुतो॒ यद॑र्ण॒सं मोष॑था वृ॒क्षं क॑प॒नेव॑ वेधसः ।
अध॑ स्मा नो अ॒रम॑तिं सजोषस॒श्चक्षु॑रिव॒ यन्त॒मनु॑ नेषथा सु॒गम् ॥६॥

Abhraji shardho maruto yadarnasam moshatha vriksham kapaneva vedhasah
Adha sma no aramatim sajoshasashchakshuriva yantamanu neshatha sugam

54.7

न स जी॑यते मरुतो॒ न ह॑न्यते॒ न स्रे॑धति॒ न व्य॑थते॒ न रि॑ष्यति ।
नास्य॒ राय॒ उप॑ दस्यन्ति॒ नोतय॒ ऋषिं॑ वा॒ यं राजा॑नं वा॒ सुषू॑दथ ॥७॥

Na sa jiyate maruto na hanyate na sredhati na vyathate na rishyati
Nasya raya upa dasyanti notaya rishim va yam rajanam va sushudatha

54.8

नि॒युत्व॑न्तो ग्राम॒जितो॒ यथा॒ नरो॑ऽर्य॒मणो॒ न म॒रुत॑ः कब॒न्धिन॑ः ।
पिन्व॒न्त्युत्सं॒ यदि॒नासो॒ अस्व॑र॒न् व्यु॑न्दन्ति पृथि॒वीं मध्वो॒ अन्ध॑सा ॥८॥

Niyutvanto gramajito yatha naroryamano na marutah kabandhinah
Pinvantyutsam yadinaso asvaran vyundanti prithivim madhvo andhasa

54.9

प्र॒वत्व॑ती॒यं पृ॑थि॒वी म॒रुद्भ्य॑ः प्र॒वत्व॑ती॒ द्यौर्भ॑वति प्र॒यद्भ्य॑ः ।
प्र॒वत्व॑तीः प॒थ्या॑ अ॒न्तरि॑क्ष्याः प्र॒वत्व॑न्त॒ः पर्व॑ता जी॒रदा॑नवः ॥९॥

Pravatvatiyam prithivi marudbhyah pravatvati dyaurbhavati prayadbhyah
Pravatvatih pathya antarikshyah pravatvantah parvata jiradanavah

54.10

यन्म॑रुतः सभरसः स्वर्णर॒ः सूर्य॒ उदि॑ते॒ मद॑था दिवो नरः ।
न वोऽश्वा॑ः श्रथय॒न्ताह॒ सिस्र॑तः स॒द्यो अ॒स्याध्व॑नः पा॒रम॑श्नुथ ॥१०॥

Yanmarutah sabharasah svarnarah surya udite madatha divo narah
Na voshvah shrathayantaha sisratah sadyo asyadhvanah paramashnutha

54.11

अंसे॑षु व ऋ॒ष्टय॑ः प॒त्सु खा॒दयो॒ वक्षः॑सु रु॒क्मा म॑रुतो॒ रथे॒ शुभ॑ः ।
अ॒ग्निभ्रा॑जसो वि॒द्युतो॒ गभ॑स्त्यो॒ः शिप्रा॑ः शी॒र्षसु॒ वित॑ता हिर॒ण्ययी॑ः ॥११॥

Anseshu va rishtayah patsu khadayo vakshahsu rukma maruto rathe shubhah
Agnibhrajaso vidyuto gabhastyoh shiprah shirshasu vitata hiranyayih

54.12

तं नाक॑म॒र्यो अगृ॑भीतशोचिषं॒ रुश॒त् पिप्प॑लं मरुतो॒ वि धू॑नुथ ।
सम॑च्यन्त वृ॒जनाति॑त्विषन्त॒ यत्स्वर॑न्ति॒ घोषं॒ वित॑तमृता॒यव॑ः ॥१२॥

Tam nakamaryo agribhitashochisham rushat pippalam maruto vi dhunutha
Samachyanta vrijanatitvishanta yatsvaranti ghosham vitatamritayavah

54.13

यु॒ष्माद॑त्तस्य मरुतो विचेतसो रा॒यः स्या॑म र॒थ्यो॒३ वय॑स्वतः ।
न यो युच्छ॑ति ति॒ष्यो॒३ यथा॑ दि॒वो॒३ऽस्मे रा॑रन्त मरुतः सह॒स्रिण॑म् ॥१३॥

Yushmadattasya maruto vichetaso rayah syama rathyo3 vayasvatah
Na yo yuchchhati tishyo3 yatha divo3sme raranta marutah sahasrinam

54.14

यू॒यं र॒यिं म॑रुतः स्पा॒र्हवी॑रं यू॒यमृषि॑मवथ॒ साम॑विप्रम् ।
यू॒यमर्व॑न्तं भर॒ताय॒ वाजं॑ यू॒यं ध॑त्थ॒ राजा॑नं श्रुष्टि॒मन्त॑म् ॥१४॥

Yuyam rayim marutah sparhaviram yuyamrishimavatha samavipram
Yuyamarvantam bharataya vajam yuyam dhattha rajanam shrushtimantam

54.15

तद् वो॑ यामि॒ द्रवि॑णं सद्यऊतयो॒ येना॒ स्व१र्ण त॒तना॑म॒ नॄँर॒भि ।
इ॒दं सु मे॑ मरुतो हर्यता॒ वचो॒ यस्य॒ तरे॑म॒ तर॑सा श॒तं हिमा॑ः ॥१५॥

Tad vo yami dravinam sadyautayo yena sva1rna tatanama nrinrabhi
Idam su me maruto haryata vacho yasya tarema tarasa shatam himah