Sukta 53

53.1

16 shyavashva atreyah, marutah, 1, 5, 10-11, 15 kakup, 2 brihati, 3 anushtup, 4 pura ushnik, 6-7, 9, 13-14, 16 satobrihati, 8, 12 gayatri

को वे॑द॒ जान॑मेषां॒ को वा॑ पु॒रा सु॒म्नेष्वा॑स म॒रुता॑म् ।
यद् यु॑यु॒ज्रे कि॑ला॒स्य॑ः ॥१॥

Ko veda janamesham ko va pura sumneshvasa marutam
Yad yuyujre kilasyah

53.2

ऐतान् रथे॑षु त॒स्थुष॒ः कः शु॑श्राव क॒था य॑युः ।
कस्मै॑ सस्रुः सु॒दासे॒ अन्वा॒पय॒ इळा॑भिर्वृ॒ष्टय॑ः स॒ह ॥२॥

Aitan ratheshu tasthushah kah shushrava katha yayuh
Kasmai sasruh sudase anvapaya ilabhirvrishtayah saha

53.3

ते म॑ आहु॒र्य आ॑य॒युरुप॒ द्युभि॒र्विभि॒र्मदे॑ ।
नरो॒ मर्या॑ अरे॒पस॑ इ॒मान् पश्य॒न्निति॑ ष्टुहि ॥३॥

Te ma ahurya ayayurupa dyubhirvibhirmade
Naro marya arepasa iman pashyanniti shtuhi

53.4

ये अ॒ञ्जिषु॒ ये वाशी॑षु॒ स्वभा॑नवः स्र॒क्षु रु॒क्मेषु॑ खा॒दिषु॑ ।
श्रा॒या रथे॑षु॒ धन्व॑सु ॥४॥

Ye anjishu ye vashishu svabhanavah srakshu rukmeshu khadishu
Shraya ratheshu dhanvasu

53.5

यु॒ष्माकं॑ स्मा॒ रथाँ॒ अनु॑ मु॒दे द॑धे मरुतो जीरदानवः ।
वृ॒ष्टी द्यावो॑ य॒तीरि॑व ॥५॥

Yushmakam sma ratham anu mude dadhe maruto jiradanavah
Vrishti dyavo yatiriva

53.6

आ यं नर॑ः सु॒दान॑वो ददा॒शुषे॑ दि॒वः कोश॒मचु॑च्यवुः ।
वि प॒र्जन्यं॑ सृजन्ति॒ रोद॑सी॒ अनु॒ धन्व॑ना यन्ति वृ॒ष्टय॑ः ॥६॥

A yam narah sudanavo dadashushe divah koshamachuchyavuh
Vi parjanyam srijanti rodasi anu dhanvana yanti vrishtayah

53.7

त॒तृ॒दा॒नाः सिन्ध॑व॒ः क्षोद॑सा॒ रज॒ः प्र स॑स्रुर्धे॒नवो॑ यथा ।
स्य॒न्ना अश्वा॑ इ॒वाध्व॑नो वि॒मोच॑ने॒ वि यद् वर्त॑न्त ए॒न्य॑ः ॥७॥

Tatridanah sindhavah kshodasa rajah pra sasrurdhenavo yatha
Syanna ashva ivadhvano vimochane vi yad vartanta enyah

53.8

आ या॑त मरुतो दि॒व आन्तरि॑क्षाद॒मादु॒त ।
माव॑ स्थात परा॒वत॑ः ॥८॥

A yata maruto diva antarikshadamaduta
Mava sthata paravatah

53.9

मा वो॑ र॒सानि॑तभा॒ कुभा॒ क्रुमु॒र्मा व॒ः सिन्धु॒र्नि री॑रमत् ।
मा व॒ः परि॑ ष्ठात् स॒रयु॑ः पुरी॒षिण्य॒स्मे इत् सु॒म्नम॑स्तु वः ॥९॥

Ma vo rasanitabha kubha krumurma vah sindhurni riramat
Ma vah pari shthat sarayuh purishinyasme it sumnamastu vah

53.10

तं व॒ः शर्धं॒ रथा॑नां त्वे॒षं ग॒णं मारु॑तं॒ नव्य॑सीनाम् ।
अनु॒ प्र य॑न्ति वृ॒ष्टय॑ः ॥१०॥

Tam vah shardham rathanam tvesham ganam marutam navyasinam
Anu pra yanti vrishtayah

53.11

शर्धं॑शर्धं व एषां॒ व्रातं॑व्रातं ग॒णंग॑णं सुश॒स्तिभि॑ः ।
अनु॑ क्रामेम धी॒तिभि॑ः ॥११॥

Shardhanshardham va esham vratanvratam gananganam sushastibhih
Anu kramema dhitibhih

53.12

कस्मा॑ अ॒द्य सुजा॑ताय रा॒तह॑व्याय॒ प्र य॑युः । ए॒ना यामे॑न म॒रुत॑ः ॥१२॥

Kasma adya sujataya ratahavyaya pra yayuh, ena yamena marutah

53.13

येन॑ तो॒काय॒ तन॑याय धा॒न्यं१ बीजं॒ वह॑ध्वे॒ अक्षि॑तम् ।
अ॒स्मभ्यं॒ तद् ध॑त्तन॒ यद् व॒ ईम॑हे॒ राधो॑ वि॒श्वायु॒ सौभ॑गम् ॥१३॥

Yena tokaya tanayaya dhanyan1 bijam vahadhve akshitam
Asmabhyam tad dhattana yad va imahe radho vishvayu saubhagam

53.14

अती॑याम नि॒दस्ति॒रः स्व॒स्तिभि॑र्हि॒त्वाव॒द्यमरा॑तीः ।
वृ॒ष्ट्वी शं योराप॑ उ॒स्रि भे॑ष॒जं स्याम॑ मरुतः स॒ह ॥१४॥

Atiyama nidastirah svastibhirhitvavadyamaratih
Vrishtvi sham yorapa usri bheshajam syama marutah saha

53.15

सु॒दे॒वः स॑महासति सु॒वीरो॑ नरो मरुत॒ः स मर्त्य॑ः । यं त्राय॑ध्वे॒ स्याम॒ ते ॥१५॥

Sudevah samahasati suviro naro marutah sa martyah, yam trayadhve syama te

53.16

स्तु॒हि भो॒जान् त्स्तु॑व॒तो अ॑स्य॒ याम॑नि॒ रण॒न् गावो॒ न यव॑से ।
य॒तः पूर्वाँ॑ इव॒ सखीँ॒रनु॑ ह्वय गि॒रा गृ॑णीहि का॒मिन॑ः ॥१६॥

Stuhi bhojan tstuvato asya yamani ranan gavo na yavase
Yatah purvam iva sakhinranu hvaya gira grinihi kaminah