সূক্ত 53

53.1

১৬ শ্যাবাশ্ব আত্রেয়ঃ। মরুতঃ। ১, ৫, ১০-১১, ১৫ ককুপ্, ২ বৃহতী, ৩ অনুষ্টুপ্, ৪ পুর উষ্ণিক্, ৬-৭, ৯, ১৩-১৪, ১৬ সতোবৃহতী, ৮, ১২ গায়ত্রী।

কো বেদ জানমেষাং কো বা পুরা সুম্নেষ্বাস মরুতাম্ ।
যদ্ যুয়ুজ্রে কিলাস্যঃ ॥১॥

ঐতান্ রথেষু তস্থুষঃ কঃ শুশ্রাব কথা যয়ুঃ ।
কস্মৈ সস্রুঃ সুদাসে অন্বাপয় ইলাভির্বৃষ্টয়ঃ সহ ॥২॥

তে ম আহুর্য আয়য়ুরুপ দ্যুভির্বিভির্মদে ।
নরো মর্যা অরেপস ইমান্ পশ্যন্নিতি ষ্টুহি ॥৩॥

যে অঞ্জিষু যে বাশীষু স্বভানবঃ স্রক্ষু রুক্মেষু খাদিষু ।
শ্রায়া রথেষু ধন্বসু ॥৪॥

যুষ্মাকং স্মা রথাঁ অনু মুদে দধে মরুতো জীরদানবঃ ।
বৃষ্টী দ্যাবো যতীরিব ॥৫॥

আ যং নরঃ সুদানবো দদাশুষে দিবঃ কোশমচুচ্যবুঃ ।
বি পর্জন্যং সৃজন্তি রোদসী অনু ধন্বনা যন্তি বৃষ্টয়ঃ ॥৬॥

ততৃদানাঃ সিন্ধবঃ ক্ষোদসা রজঃ প্র সস্রুর্ধেনবো যথা ।
স্যন্না অশ্বা ইবাধ্বনো বিমোচনে বি যদ্ বর্তন্ত এন্যঃ ॥৭॥

আ যাত মরুতো দিব আন্তরিক্ষাদমাদুত ।
মাব স্থাত পরাবতঃ ॥৮॥

মা বো রসানিতভা কুভা ক্রুমুর্মা বঃ সিন্ধুর্নি রীরমৎ ।
মা বঃ পরি ষ্ঠাৎ সরয়ুঃ পুরীষিণ্যস্মে ইৎ সুম্নমস্তু বঃ ॥৯॥

তং বঃ শর্ধং রথানাং ত্বেষং গণং মারুতং নব্যসীনাম্ ।
অনু প্র যন্তি বৃষ্টয়ঃ ॥১০॥

শর্ধংশর্ধং ব এষাং ব্রাতংব্রাতং গণংগণং সুশস্তিভিঃ ।
অনু ক্রামেম ধীতিভিঃ ॥১১॥

কস্মা অদ্য সুজাতায় রাতহব্যায় প্র যয়ুঃ । এনা যামেন মরুতঃ ॥১২॥

যেন তোকায় তনয়ায় ধান্যং১ বীজং বহধ্বে অক্ষিতম্ ।
অস্মভ্যং তদ্ ধত্তন যদ্ ব ঈমহে রাধো বিশ্বায়ু সৌভগম্ ॥১৩॥

অতীয়াম নিদস্তিরঃ স্বস্তিভির্হিত্বাবদ্যমরাতীঃ ।
বৃষ্ট্বী শং যোরাপ উস্রি ভেষজং স্যাম মরুতঃ সহ ॥১৪॥

সুদেবঃ সমহাসতি সুবীরো নরো মরুতঃ স মর্ত্যঃ । যং ত্রায়ধ্বে স্যাম তে ॥১৫॥

স্তুহি ভোজান্ ত্স্তুবতো অস্য যামনি রণন্ গাবো ন যবসে ।
যতঃ পূর্বাঁ ইব সখীঁরনু হ্বয় গিরা গৃণীহি কামিনঃ ॥১৬॥