সূক্ত 52

52.1

১৭ শ্যাবাশ্ব আত্রেয়ঃ। মরুতঃ। অনুষ্টুপ্, ৬, ১৬-১৭ পঙ্ক্তিঃ।

প্র শ্যাবাশ্ব ধৃষ্ণুয়ার্চা মরুদ্ভিৠক্বভিঃ ।
যে অদ্রোঘমনুষ্বধং শ্রবো মদন্তি যজ্ঞিয়াঃ ॥১॥

তে হি স্থিরস্য শবসঃ সখায়ঃ সন্তি ধৃষ্ণুয়া ।
তে যামন্না ধৃষদ্বিনস্ত্মনা পান্তি শশ্বতঃ ॥২॥

তে স্যন্দ্রাসো নোক্ষণোঽতি ষ্কন্দন্তি শর্বরীঃ ।
মরুতামধা মহো দিবি ক্ষমা চ মন্মহে ॥৩॥

মরুত্সু বো দধীমহি স্তোমং যজ্ঞং চ ধৃষ্ণুয়া ।
বিশ্বে যে মানুষা যুগা পান্তি মর্ত্যং রিষঃ ॥৪॥

অর্হন্তো যে সুদানবো নরো অসামিশবসঃ ।
প্র যজ্ঞং যজ্ঞিয়েভ্যো দিবো অর্চা মরুদ্ভ্যঃ ॥৫॥

আ রুক্মৈরা যুধা নর ঋষ্বা ঋষ্টীরসৃক্ষত ।
অন্বেনাঁ অহ বিদ্যুতো মরুতো জজ্ঝতীরিব ভানুরর্ত ত্মনা দিবঃ ॥৬॥

যে বাবৃধন্ত পার্থিবা য উরাবন্তরিক্ষ আ ।
বৃজনে বা নদীনাং সধস্থে বা মহো দিবঃ ॥৭॥

শর্ধো মারুতমুচ্ছংস সত্যশবসমৃভ্বসম্ ।
উত স্ম তে শুভে নরঃ প্র স্যন্দ্রা যুজত ত্মনা ॥৮॥

উত স্ম তে পরুষ্ণ্যামূর্ণা বসত শুন্ধ্যবঃ ।
উত পব্যা রথানামদ্রিং ভিন্দন্ত্যোজসা ॥৯॥

আপথয়ো বিপথয়োঽন্তস্পথা অনুপথাঃ ।
এতেভির্মহ্যং নামভির্যজ্ঞং বিষ্টার ওহতে ॥১০॥

অধা নরো ন্যোহতেঽধা নিয়ুত ওহতে ।
অধা পারাবতা ইতি চিত্রা রূপাণি দর্শ্যা ॥১১॥

ছন্দঃস্তুভঃ কুভন্যব উত্সমা কীরিণো নৃতুঃ ।
তে মে কে চিন্ন তায়ব ঊমা আসন্ দৃশি ত্বিষে ॥১২॥

য ঋষ্বা ঋষ্টিবিদ্যুতঃ কবয়ঃ সন্তি বেধসঃ ।
তমৃষে মারুতং গণং নমস্যা রময়া গিরা ॥১৩॥

অচ্ছ ঋষে মারুতং গণং দানা মিত্রং ন যোষণা ।
দিবো বা ধৃষ্ণব ওজসা স্তুতা ধীভিরিষণ্যত ॥১৪॥

নূ মন্বান এষাং দেবাঁ অচ্ছা ন বক্ষণা ।
দানা সচেত সূরিভির্যামশ্রুতেভিরঞ্জিভিঃ ॥১৫॥

প্র যে মে বন্ধ্বেষে গাং বোচন্ত সূরয়ঃ পৃশ্নিং বোচন্ত মাতরম্ ।
অধা পিতরমিষ্মিণং রুদ্রং বোচন্ত শিক্বসঃ ॥১৬॥

সপ্ত মে সপ্ত শাকিন একমেকা শতা দদুঃ ।
যমুনায়ামধি শ্রুতমুদ্ রাধো গব্যং মৃজে নি রাধো অশ্ব্যং মৃজে ॥১৭॥