সূক্ত 51

51.1

১৫ স্বস্ত্যাত্রেয়ঃ। বিশ্বে দেবাঃ, ৪, ৬-৭ ইন্দ্রবায়ূ, ৫ বায়ুঃ।১-৪ গায়ত্রী, ৫-১০ উষ্ণিক্, ১১-১৩ জগতী ত্রিষ্টুব্বা, ১৪-১৫ অনুষ্টুপ্।

অগ্নে সুতস্য পীতয়ে বিশ্বৈরূমেভিরা গহি । দেবেভির্হব্যদাতয়ে ॥১॥

ঋতধীতয় আ গত সত্যধর্মাণো অধ্বরম্ । অগ্নেঃ পিবত জিহ্বয়া ॥২॥

বিপ্রেভির্বিপ্র সন্ত্য প্রাতর্যাবভিরা গহি । দেবেভিঃ সোমপীতয়ে ॥৩॥

অয়ং সোমশ্চমূ সুতোঽমত্রে পরি ষিচ্যতে । প্রিয় ইন্দ্রায় বায়বে ॥৪॥

বায়বা যাহি বীতয়ে জুষাণো হব্যদাতয়ে । পিবা সুতস্যান্ধসো অভি প্রয়ঃ ॥৫॥

ইন্দ্রশ্চ বায়বেষাং সুতানাং পীতিমর্হথঃ । তাঞ্জুষেথামরেপসাবভি প্রয়ঃ ॥৬॥

সুতা ইন্দ্রায় বায়বে সোমাসো দধ্যাশিরঃ । নিম্নং ন যন্তি সিন্ধবোঽভি প্রয়ঃ ॥৭॥

সজূর্বিশ্বেভির্দেবেভিরশ্বিভ্যামুষসা সজূঃ । আ যাহ্যগ্নে অত্রিবৎ সুতে রণ ॥৮॥

সজূর্মিত্রাবরুণাভ্যাং সজূঃ সোমেন বিষ্ণুনা । আ যাহ্যগ্নে অত্রিবৎ সুতে রণ ॥৯॥

সজূরাদিত্যৈর্বসুভিঃ সজূরিন্দ্রেণ বায়ুনা । আ যাহ্যগ্নে অত্রিবৎ সুতে রণ ॥১০॥

স্বস্তি নো মিমীতামশ্বিনা ভগঃ স্বস্তি দেব্যদিতিরনর্বণঃ ।
স্বস্তি পূষা অসুরো দধাতু নঃ স্বস্তি দ্যাবাপৃথিবী সুচেতুনা ॥১১॥

স্বস্তয়ে বায়ুমুপ ব্রবামহৈ সোমং স্বস্তি ভুবনস্য যস্পতিঃ ।
বৃহস্পতিং সর্বগণং স্বস্তয়ে স্বস্তয় আদিত্যাসো ভবন্তু নঃ ॥১২॥

বিশ্বে দেবা নো অদ্যা স্বস্তয়ে বৈশ্বানরো বসুরগ্নিঃ স্বস্তয়ে ।
দেবা অবন্ত্বৃভবঃ স্বস্তয়ে স্বস্তি নো রুদ্রঃ পাত্বংহসঃ ॥১৩॥

স্বস্তি মিত্রাবরুণা স্বস্তি পথ্যে রেবতি ।
স্বস্তি ন ইন্দ্রশ্চাগ্নিশ্চ স্বস্তি নো অদিতে কৃধি ॥১৪॥

স্বস্তি পন্থামনু চরেম সূর্যাচন্দ্রমসাবিব ।
পুনর্দদতাঘ্নতা জানতা সং গমেমহি ॥১৫॥