Sukta 51

51.1

15 svastyatreyah, vishve devah, 4, 6-7 indravayu, 5 vayuh, 1-4 gayatri, 5-10 ushnik, 11-13 jagati trishtubva, 14-15 anushtup

अग्ने॑ सु॒तस्य॑ पी॒तये॒ विश्वै॒रूमे॑भि॒रा ग॑हि । दे॒वेभि॑र्ह॒व्यदा॑तये ॥१॥

Agne sutasya pitaye vishvairumebhira gahi, devebhirhavyadataye

ऋत॑धीतय॒ आ ग॑त॒ सत्य॑धर्माणो अध्व॒रम् । अ॒ग्नेः पि॑बत जि॒ह्वया॑ ॥२॥

Ritadhitaya a gata satyadharmano adhvaram, agneh pibata jihvaya

विप्रे॑भिर्विप्र सन्त्य प्रात॒र्याव॑भि॒रा ग॑हि । दे॒वेभि॒ः सोम॑पीतये ॥३॥

Viprebhirvipra santya prataryavabhira gahi, devebhih somapitaye

अ॒यं सोम॑श्च॒मू सु॒तोऽम॑त्रे॒ परि॑ षिच्यते । प्रि॒य इन्द्रा॑य वा॒यवे॑ ॥४॥

Ayam somashchamu sutomatre pari shichyate, priya indraya vayave

वाय॒वा या॑हि वी॒तये॑ जुषा॒णो ह॒व्यदा॑तये । पिबा॑ सु॒तस्यान्ध॑सो अ॒भि प्रय॑ः ॥५॥

Vayava yahi vitaye jushano havyadataye, piba sutasyandhaso abhi prayah

इन्द्र॑श्च वायवेषां सु॒तानां॑ पी॒तिम॑र्हथः । ताञ्जु॑षेथामरे॒पसा॑व॒भि प्रय॑ः ॥६॥

Indrashcha vayavesham sutanam pitimarhathah, tanjushethamarepasavabhi prayah

सु॒ता इन्द्रा॑य वा॒यवे॒ सोमा॑सो॒ दध्या॑शिरः । नि॒म्नं न य॑न्ति॒ सिन्ध॑वो॒ऽभि प्रय॑ः ॥७॥

Suta indraya vayave somaso dadhyashirah, nimnam na yanti sindhavobhi prayah

स॒जूर्विश्वे॑भिर्दे॒वेभि॑र॒श्विभ्या॑मु॒षसा॑ स॒जूः । आ या॑ह्यग्ने अत्रि॒वत् सु॒ते र॑ण ॥८॥

Sajurvishvebhirdevebhirashvibhyamushasa sajuh, a yahyagne atrivat sute rana

स॒जूर्मि॒त्रावरु॑णाभ्यां स॒जूः सोमे॑न॒ विष्णु॑ना । आ या॑ह्यग्ने अत्रि॒वत् सु॒ते र॑ण ॥९॥

Sajurmitravarunabhyam sajuh somena vishnuna, a yahyagne atrivat sute rana

स॒जूरा॑दि॒त्यैर्वसु॑भिः स॒जूरिन्द्रे॑ण वा॒युना॑ । आ या॑ह्यग्ने अत्रि॒वत् सु॒ते र॑ण ॥१०॥

Sajuradityairvasubhih sajurindrena vayuna, a yahyagne atrivat sute rana

स्व॒स्ति नो॑ मिमीताम॒श्विना॒ भग॑ः स्व॒स्ति दे॒व्यदि॑तिरन॒र्वण॑ः ।
स्व॒स्ति पू॒षा असु॑रो दधातु नः स्व॒स्ति द्यावा॑पृथि॒वी सु॑चे॒तुना॑ ॥११॥

Svasti no mimitamashvina bhagah svasti devyaditiranarvanah
Svasti pusha asuro dadhatu nah svasti dyavaprithivi suchetuna

स्व॒स्तये॑ वा॒युमुप॑ ब्रवामहै॒ सोमं॑ स्व॒स्ति भुव॑नस्य॒ यस्पति॑ः ।
बृह॒स्पतिं॒ सर्व॑गणं स्व॒स्तये॑ स्व॒स्तय॑ आदि॒त्यासो॑ भवन्तु नः ॥१२॥

Svastaye vayumupa bravamahai somam svasti bhuvanasya yaspatih
Brihaspatim sarvaganam svastaye svastaya adityaso bhavantu nah

विश्वे॑ दे॒वा नो॑ अ॒द्या स्व॒स्तये॑ वैश्वान॒रो वसु॑र॒ग्निः स्व॒स्तये॑ ।
दे॒वा अ॑वन्त्वृ॒भव॑ः स्व॒स्तये॑ स्व॒स्ति नो॑ रु॒द्रः पा॒त्वंह॑सः ॥१३॥

Vishve deva no adya svastaye vaishvanaro vasuragnih svastaye
Deva avantvribhavah svastaye svasti no rudrah patvanhasah

स्व॒स्ति मि॑त्रावरुणा स्व॒स्ति प॑थ्ये रेवति ।
स्व॒स्ति न॒ इन्द्र॑श्चा॒ग्निश्च॑ स्व॒स्ति नो॑ अदिते कृधि ॥१४॥

Svasti mitravaruna svasti pathye revati
Svasti na indrashchagnishcha svasti no adite kridhi

स्व॒स्ति पन्था॒मनु॑ चरेम सूर्याचन्द्र॒मसा॑विव ।
पुन॒र्दद॒ताघ्न॑ता जान॒ता सं ग॑मेमहि ॥१५॥

Svasti panthamanu charema suryachandramasaviva
Punardadataghnata janata sam gamemahi