সূক্ত 58

58.1

৮ শ্যাবাশ্ব আত্রেয়ঃ। মরুতঃ। ত্রিষ্টুপ্ ।

তমু নূনং তবিষীমন্তমেষাং স্তুষে গণং মারুতং নব্যসীনাম্ ।
য আশ্বশ্বা অমবদ্ বহন্ত উতেশিরে অমৃতস্য স্বরাজঃ ॥১॥

ত্বেষং গণং তবসং খাদিহস্তং ধুনিব্রতং মায়িনং দাতিবারম্ ।
ময়োভুবো যে অমিতা মহিত্বা বন্দস্ব বিপ্র তুবিরাধসো নৄন্ ॥২॥

আ বো যন্তূদবাহাসো অদ্য বৃষ্টিং যে বিশ্বে মরুতো জুনন্তি ।
অয়ং যো অগ্নির্মরুতঃ সমিদ্ধ এতং জুষধ্বং কবয়ো যুবানঃ ॥৩॥

যূয়ং রাজানমির্যং জনায় বিভ্বতষ্টং জনয়থা যজত্রাঃ ।
যুষ্মদেতি মুষ্টিহা বাহুজূতো যুষ্মৎ সদশ্বো মরুতঃ সুবীরঃ ॥৪॥

অরা ইবেদচরমা অহেব প্রপ্র জায়ন্তে অকবা মহোভিঃ ।
পৃশ্নেঃ পুত্রা উপমাসো রভিষ্ঠাঃ স্বয়া মত্যা মরুতঃ সং মিমিক্ষুঃ ॥৫॥

যৎ প্রায়াসিষ্ট পৃষতীভিরশ্বৈর্বীলুপবিভির্মরুতো রথেভিঃ ।
ক্ষোদন্ত আপো রিণতে বনান্যবোস্রিয়ো বৃষভঃ ক্রন্দতু দ্যৌঃ ॥৬॥

প্রথিষ্ট যামন্ পৃথিবী চিদেষাং ভর্তেব গর্ভং স্বমিচ্ছবো ধুঃ ।
বাতান্ হ্যশ্বান্ ধুর্যায়ুয়ুজ্রে বর্ষং স্বেদং চক্রিরে রুদ্রিয়াসঃ ॥৭॥

হয়ে নরো মরুতো মৃলতা নস্তুবীমঘাসো অমৃতা ঋতজ্ঞাঃ ।
সত্যশ্রুতঃ কবয়ো যুবানো বৃহদ্গিরয়ো বৃহদুক্ষমাণাঃ ॥৮॥