সূক্ত 47

47.1

৭ প্রতিরথ আত্রেয়ঃ। বিশ্বে দেবাঃ। ত্রিষ্টুপ্।

প্রয়ুঞ্জতী দিব এতি ব্রুবাণা মহী মাতা দুহিতুর্বোধয়ন্তী ।
আবিবাসন্তী যুবতির্মনীষা পিতৃভ্য আ সদনে জোহুবানা ॥১॥

অজিরাসস্তদপ ঈয়মানা আতস্থিবাংসো অমৃতস্য নাভিম্ ।
অনন্তাস উরবো বিশ্বতঃ সীং পরি দ্যাবাপৃথিবী যন্তি পন্থাঃ ॥২॥

উক্ষা সমুদ্রো অরুষঃ সুপর্ণঃ পূর্বস্য যোনিং পিতুরা বিবেশ ।
মধ্যে দিবো নিহিতঃ পৃশ্নিরশ্মা বি চক্রমে রজসস্পাত্যন্তৌ ॥৩॥

চত্বার ঈং বিভ্রতি ক্ষেময়ন্তো দশ গর্ভং চরসে ধাপয়ন্তে ।
ত্রিধাতবঃ পরমা অস্য গাবো দিবশ্চরন্তি পরি সদ্যো অন্তান্ ॥৪॥

ইদং বপুর্নিবচনং জনাসশ্চরন্তি যন্নদ্যস্তস্থুরাপঃ ।
দ্বে যদীং বিভৃতো মাতুরন্যে ইহেহ জাতে যম্যা৩ সবন্ধূ ॥৫॥

বি তন্বতে ধিয়ো অস্মা অপাংসি বস্ত্রা পুত্রায় মাতরো বয়ন্তি ।
উপপ্রক্ষে বৃষণো মোদমানা দিবস্পথা বধ্বো যন্ত্যচ্ছ ॥৬॥

তদস্তু মিত্রাবরুণা তদগ্নে শং যোরস্মভ্যমিদমস্তু শস্তম্ ।
অশীমহি গাধমুত প্রতিষ্ঠাং নমো দিবে বৃহতে সাদনায় ॥৭॥