Sukta 47

47.1

7 pratiratha atreyah, vishve devah, trishtup

प्र॒यु॒ञ्ज॒ती दि॒व ए॑ति ब्रुवा॒णा म॒ही मा॒ता दु॑हि॒तुर्बो॒धय॑न्ती ।
आ॒विवा॑सन्ती युव॒तिर्म॑नी॒षा पि॒तृभ्य॒ आ सद॑ने॒ जोहु॑वाना ॥१॥

Prayunjati diva eti bruvana mahi mata duhiturbodhayanti
Avivasanti yuvatirmanisha pitribhya a sadane johuvana

अ॒जि॒रास॒स्तद॑प॒ ईय॑माना आतस्थि॒वांसो॑ अ॒मृत॑स्य॒ नाभि॑म् ।
अ॒न॒न्तास॑ उ॒रवो॑ वि॒श्वत॑ः सीं॒ परि॒ द्यावा॑पृथि॒वी य॑न्ति॒ पन्था॑ः ॥२॥

Ajirasastadapa iyamana atasthivanso amritasya nabhim
Anantasa uravo vishvatah sim pari dyavaprithivi yanti panthah

उ॒क्षा स॑मु॒द्रो अ॑रु॒षः सु॑प॒र्णः पूर्व॑स्य॒ योनिं॑ पि॒तुरा वि॑वेश ।
मध्ये॑ दि॒वो निहि॑त॒ः पृश्नि॒रश्मा॒ वि च॑क्रमे॒ रज॑सस्पा॒त्यन्तौ॑ ॥३॥

Uksha samudro arushah suparnah purvasya yonim pitura vivesha
Madhye divo nihitah prishnirashma vi chakrame rajasaspatyantau

च॒त्वार॑ ईं बिभ्रति क्षेम॒यन्तो॒ दश॒ गर्भं॑ च॒रसे॑ धापयन्ते ।
त्रि॒धात॑वः पर॒मा अ॑स्य॒ गावो॑ दि॒वश्च॑रन्ति॒ परि॑ स॒द्यो अन्ता॑न् ॥४॥

Chatvara im bibhrati kshemayanto dasha garbham charase dhapayante
Tridhatavah parama asya gavo divashcharanti pari sadyo antan

इ॒दं वपु॑र्नि॒वच॑नं जनास॒श्चर॑न्ति॒ यन्न॒द्य॑स्त॒स्थुराप॑ः ।
द्वे यदीं॑ बिभृ॒तो मा॒तुर॒न्ये इ॒हेह॑ जा॒ते य॒म्या॒३ सब॑न्धू ॥५॥

Idam vapurnivachanam janasashcharanti yannadyastasthurapah
Dve yadim bibhrito maturanye iheha jate yamya3 sabandhu

वि त॑न्वते॒ धियो॑ अस्मा॒ अपां॑सि॒ वस्त्रा॑ पु॒त्राय॑ मा॒तरो॑ वयन्ति ।
उ॒प॒प्र॒क्षे वृष॑णो॒ मोद॑माना दि॒वस्प॒था व॒ध्वो॑ य॒न्त्यच्छ॑ ॥६॥

Vi tanvate dhiyo asma apansi vastra putraya mataro vayanti
Upaprakshe vrishano modamana divaspatha vadhvo yantyachchha

तद॑स्तु मित्रावरुणा॒ तद॑ग्ने॒ शं योर॒स्मभ्य॑मि॒दम॑स्तु श॒स्तम् ।
अ॒शी॒महि॑ गा॒धमु॒त प्र॑ति॒ष्ठां नमो॑ दि॒वे बृ॑ह॒ते साद॑नाय ॥७॥

Tadastu mitravaruna tadagne sham yorasmabhyamidamastu shastam
Ashimahi gadhamuta pratishtham namo dive brihate sadanaya