Sukta 48

48.1

5 pratibhanuratreyah, vishve devah, jagati

कदु॑ प्रि॒याय॒ धाम्ने॑ मनामहे॒ स्वक्ष॑त्राय॒ स्वय॑शसे म॒हे व॒यम् ।
आ॒मे॒न्यस्य॒ रज॑सो॒ यद॒भ्र आँ अ॒पो वृ॑णा॒ना वि॑त॒नोति॑ मा॒यिनी॑ ॥१॥

Kadu priyaya dhamne manamahe svakshatraya svayashase mahe vayam
Amenyasya rajaso yadabhra am apo vrinana vitanoti mayini

48.2

ता अ॑त्नत व॒युनं॑ वी॒रव॑क्षणं समा॒न्या वृ॒तया॒ विश्व॒मा रज॑ः ।
अपो॒ अपा॑ची॒रप॑रा॒ अपे॑जते॒ प्र पूर्वा॑भिस्तिरते देव॒युर्जन॑ः ॥२॥

Ta atnata vayunam viravakshanam samanya vritaya vishvama rajah
Apo apachirapara apejate pra purvabhistirate devayurjanah

48.3

आ ग्राव॑भिरह॒न्ये॑भिर॒क्तुभि॒र्वरि॑ष्ठं॒ वज्र॒मा जि॑घर्ति मा॒यिनि॑ ।
श॒तं वा॒ यस्य॑ प्र॒चर॒न् त्स्वे दमे॑ संव॒र्तय॑न्तो॒ वि च॑ वर्तय॒न्नहा॑ ॥३॥

A gravabhirahanyebhiraktubhirvarishtham vajrama jigharti mayini
Shatam va yasya pracharan tsve dame sanvartayanto vi cha vartayannaha

48.4

ताम॑स्य री॒तिं प॑र॒शोरि॑व॒ प्रत्यनी॑कमख्यं भु॒जे अ॑स्य॒ वर्प॑सः ।
सचा॒ यदि॑ पितु॒मन्त॑मिव॒ क्षयं॒ रत्नं॒ दधा॑ति॒ भर॑हूतये वि॒शे ॥४॥

Tamasya ritim parashoriva pratyanikamakhyam bhuje asya varpasah
Sacha yadi pitumantamiva kshayam ratnam dadhati bharahutaye vishe

48.5

स जि॒ह्वया॒ चतु॑रनीक ऋञ्जते॒ चारु॒ वसा॑नो॒ वरु॑णो॒ यत॑न्न॒रिम् ।
न तस्य॑ विद्म पुरुष॒त्वता॑ व॒यं यतो॒ भग॑ः सवि॒ता दाति॒ वार्य॑म् ॥५॥

Sa jihvaya chaturanika rinjate charu vasano varuno yatannarim
Na tasya vidma purushatvata vayam yato bhagah savita dati varyam