Sukta 49

49.1

5 pratiprabha atreyah, (5 trinapanih), vishve devah, trishtup

दे॒वं वो॑ अ॒द्य स॑वि॒तार॒मेषे॒ भगं॑ च॒ रत्नं॑ वि॒भज॑न्तमा॒योः ।
आ वां॑ नरा पुरुभुजा ववृत्यां दि॒वेदि॑वे चिदश्विना सखी॒यन् ॥१॥

Devam vo adya savitarameshe bhagam cha ratnam vibhajantamayoh
A vam nara purubhuja vavrityam divedive chidashvina sakhiyan

प्रति॑ प्र॒याण॒मसु॑रस्य वि॒द्वान् त्सू॒क्तैर्दे॒वं स॑वि॒तारं॑ दुवस्य ।
उप॑ ब्रुवीत॒ नम॑सा विजा॒नञ्ज्येष्ठं॑ च॒ रत्नं॑ वि॒भज॑न्तमा॒योः ॥२॥

Prati prayanamasurasya vidvan tsuktairdevam savitaram duvasya
Upa bruvita namasa vijananjyeshtham cha ratnam vibhajantamayoh

अ॒द॒त्र॒या द॑यते॒ वार्या॑णि पू॒षा भगो॒ अदि॑ति॒र्वस्त॑ उ॒स्रः ।
इन्द्रो॒ विष्णु॒र्वरु॑णो मि॒त्रो अ॒ग्निरहा॑नि भ॒द्रा ज॑नयन्त द॒स्माः ॥३॥

Adatraya dayate varyani pusha bhago aditirvasta usrah
Indro vishnurvaruno mitro agnirahani bhadra janayanta dasmah

तन्नो॑ अन॒र्वा स॑वि॒ता वरू॑थं॒ तत् सिन्ध॑व इ॒षय॑न्तो॒ अनु॑ ग्मन् ।
उप॒ यद् वोचे॑ अध्व॒रस्य॒ होता॑ रा॒यः स्या॑म॒ पत॑यो॒ वाज॑रत्नाः ॥४॥

Tanno anarva savita varutham tat sindhava ishayanto anu gman
Upa yad voche adhvarasya hota rayah syama patayo vajaratnah

प्र ये वसु॑भ्य॒ ईव॒दा नमो॒ दुर्ये मि॒त्रे वरु॑णे सू॒क्तवा॑चः ।
अवै॒त्वभ्वं॑ कृणु॒ता वरी॑यो दि॒वस्पृ॑थि॒व्योरव॑सा मदेम ॥५॥

Pra ye vasubhya ivada namo durye mitre varune suktavachah
Avaitvabhvam krinuta variyo divasprithivyoravasa madema