Sukta 46

46.1

8 pratikshatra atreyah, vishve devah, 7-8 devapatnyah, jagati, 2, 8 trishtup

हयो॒ न वि॒द्वाँ अ॑युजि स्व॒यं धु॒रि तां व॑हामि प्र॒तर॑णीमव॒स्युव॑म् ।
नास्या॑ वश्मि वि॒मुचं॒ नावृत॒॒ पुन॑र्वि॒द्वान् प॒थः पु॑रए॒त ऋ॒जु ने॑षति ॥१॥

Hayo na vidvam ayuji svayam dhuri tam vahami prataranimavasyuvam
Nasya vashmi vimucham navrita punarvidvan pathah puraeta riju neshati

46.2

अग्न॒ इन्द्र॒ वरु॑ण॒ मित्र॒ देवा॒ः शर्ध॒ः प्र य॑न्त॒ मारु॑तो॒त वि॑ष्णो ।
उ॒भा नास॑त्या रु॒द्रो अध॒ ग्नाः पू॒षा भग॒ः सर॑स्वती जुषन्त ॥२॥

Agna indra varuna mitra devah shardhah pra yanta marutota vishno
Ubha nasatya rudro adha gnah pusha bhagah sarasvati jushanta

46.3

इ॒न्द्रा॒ग्नी मि॒त्रावरु॒णादि॑तिं॒ स्व॑ः पृथि॒वीं द्यां म॒रुत॒ः पर्व॑ताँ अ॒पः ।
हु॒वे विष्णुं॑ पू॒षणं॒ ब्रह्म॑ण॒स्पतिं॒ भगं॒ नु शंसं॑ सवि॒तार॑मू॒तये॑ ॥३॥

Indragni mitravarunaditim svah prithivim dyam marutah parvatam apah
Huve vishnum pushanam brahmanaspatim bhagam nu shansam savitaramutaye

46.4

उ॒त नो॒ विष्णु॑रु॒त वातो॑ अ॒स्रिधो॑ द्रविणो॒दा उ॒त सोमो॒ मय॑स्करत् ।
उ॒त ऋ॒भव॑ उ॒त रा॒ये नो॑ अ॒श्विनो॒त त्वष्टो॒त विभ्वानु॑ मंसते ॥४॥

Uta no vishnuruta vato asridho dravinoda uta somo mayaskarat
Uta ribhava uta raye no ashvinota tvashtota vibhvanu mansate

46.5

उ॒त त्यन्नो॒ मारु॑तं॒ शर्ध॒ आ ग॑मद् दिविक्ष॒यं य॑ज॒तं ब॒र्हिरा॒सदे॑ ।
बृह॒स्पति॒ः शर्म॑ पू॒षोत नो॑ यमद् वरू॒थ्यं१ वरु॑णो मि॒त्रो अ॑र्य॒मा ॥५॥

Uta tyanno marutam shardha a gamad divikshayam yajatam barhirasade
Brihaspatih sharma pushota no yamad varuthyan1 varuno mitro aryama

46.6

उ॒त त्ये न॒ः पर्व॑तासः सुश॒स्तय॑ः सुदी॒तयो॑ न॒द्य१स्त्राम॑णे भुवन् ।
भगो॑ विभ॒क्ता शव॒साव॒सा ग॑मदुरु॒व्यचा॒ अदि॑तिः श्रोतु मे॒ हव॑म् ॥६॥

Uta tye nah parvatasah sushastayah suditayo nadya1stramane bhuvan
Bhago vibhakta shavasavasa gamaduruvyacha aditih shrotu me havam

46.7

दे॒वानां॒ पत्नी॑रुश॒तीर॑वन्तु न॒ः प्राव॑न्तु नस्तु॒जये॒ वाज॑सातये ।
याः पार्थि॑वासो॒ या अ॒पामपि॑ व्र॒ते ता नो॑ देवीः सुहवा॒ः शर्म॑ यच्छत ॥७॥

Devanam patnirushatiravantu nah pravantu nastujaye vajasataye
Yah parthivaso ya apamapi vrate ta no devih suhavah sharma yachchhata

46.8

उ॒त ग्ना व्य॑न्तु दे॒वप॑त्नीरिन्द्रा॒ण्य१ग्नाय्य॒श्विनी॒ राट् ।
आ रोद॑सी वरुणा॒नी शृ॑णोतु॒ व्यन्तु॑ दे॒वीर्य ऋ॒तुर्जनी॑नाम् ॥८॥

Uta gna vyantu devapatnirindranya1gnayyashvini rat
A rodasi varunani shrinotu vyantu devirya riturjaninam