সূক্ত 46

46.1

৮ প্রতিক্ষত্র আত্রেয়ঃ। বিশ্বে দেবাঃ, ৭-৮ দেবপত্ন্যঃ। জগতী, ২, ৮ ত্রিষ্টুপ্।

হয়ো ন বিদ্বাঁ অয়ুজি স্বয়ং ধুরি তাং বহামি প্রতরণীমবস্যুবম্ ।
নাস্যা বশ্মি বিমুচং নাবৃত পুনর্বিদ্বান্ পথঃ পুরএত ঋজু নেষতি ॥১॥

অগ্ন ইন্দ্র বরুণ মিত্র দেবাঃ শর্ধঃ প্র যন্ত মারুতোত বিষ্ণো ।
উভা নাসত্যা রুদ্রো অধ গ্নাঃ পূষা ভগঃ সরস্বতী জুষন্ত ॥২॥

ইন্দ্রাগ্নী মিত্রাবরুণাদিতিং স্বঃ পৃথিবীং দ্যাং মরুতঃ পর্বতাঁ অপঃ ।
হুবে বিষ্ণুং পূষণং ব্রহ্মণস্পতিং ভগং নু শংসং সবিতারমূতয়ে ॥৩॥

উত নো বিষ্ণুরুত বাতো অস্রিধো দ্রবিণোদা উত সোমো ময়স্করৎ ।
উত ঋভব উত রায়ে নো অশ্বিনোত ত্বষ্টোত বিভ্বানু মংসতে ॥৪॥

উত ত্যন্নো মারুতং শর্ধ আ গমদ্ দিবিক্ষয়ং যজতং বর্হিরাসদে ।
বৃহস্পতিঃ শর্ম পূষোত নো যমদ্ বরূথ্যং১ বরুণো মিত্রো অর্যমা ॥৫॥

উত ত্যে নঃ পর্বতাসঃ সুশস্তয়ঃ সুদীতয়ো নদ্য১স্ত্রামণে ভুবন্ ।
ভগো বিভক্তা শবসাবসা গমদুরুব্যচা অদিতিঃ শ্রোতু মে হবম্ ॥৬॥

দেবানাং পত্নীরুশতীরবন্তু নঃ প্রাবন্তু নস্তুজয়ে বাজসাতয়ে ।
যাঃ পার্থিবাসো যা অপামপি ব্রতে তা নো দেবীঃ সুহবাঃ শর্ম যচ্ছত ॥৭॥

উত গ্না ব্যন্তু দেবপত্নীরিন্দ্রাণ্য১গ্নায্যশ্বিনী রাট্ ।
আ রোদসী বরুণানী শৃণোতু ব্যন্তু দেবীর্য ঋতুর্জনীনাম্ ॥৮॥