সূক্ত 45

45.1

১১ সদাপৃণা আত্রেয়ঃ। বিশ্বে দেবাঃ। ত্রিষ্টুপ্ ৯ পুরস্তাজ্জ্যোতিঃ।

বিদা দিবো বিষ্যন্নদ্রিমুক্থৈরায়ত্যা উষসো অর্চিনো গুঃ ।
অপাবৃত ব্রজিনীরুৎ স্বর্গাদ্ বি দুরো মানুষীর্দেব আবঃ ॥১॥

45.2

বি সূর্যো অমতিং ন শ্রিয়ং সাদোর্বাদ্ গবাং মাতা জানতী গাৎ ।
ধন্বর্ণসো নদ্য১ঃ খাদোঅর্ণাঃ স্থূণেব সুমিতা দৃংহত দ্যৌঃ ॥২॥

45.3

অস্মা উক্থায় পর্বতস্য গর্ভো মহীনাং জনুষে পূর্ব্যায় ।
বি পর্বতো জিহীত সাধত দ্যৌরাবিবাসন্তো দসয়ন্ত ভূম ॥৩॥

45.4

সূক্তেভির্বো বচোভির্দেবজুষ্টৈরিন্দ্রা ন্ব১গ্নী অবসে হুবধ্যৈ ।
উক্থেভির্হি ষ্মা কবয়ঃ সুয়জ্ঞা আবিবাসন্তো মরুতো যজন্তি ॥৪॥

45.5

এতো ন্ব১দ্য সুধ্যো৩ ভবাম প্র দুচ্ছুনা মিনবামা বরীয়ঃ ।
আরে দ্বেষাংসি সনুতর্দধামাঽয়াম প্রাঞ্চো যজমানমচ্ছ ॥৫॥

45.6

এতা ধিয়ং কৃণবামা সখায়োঽপ যা মাতাঁ ঋণুত ব্রজং গোঃ ।
যয়া মনুর্বিশিশিপ্রং জিগায় যয়া বণিগ্বঙ্কুরাপা পুরীষম্ ॥৬॥

45.7

অনূনোদত্র হস্তয়তো অদ্রিরার্চন্ যেন দশ মাসো নবগ্বাঃ ।
ঋতং যতী সরমা গা অবিন্দদ্ বিশ্বানি সত্যাঙ্গিরাশ্চকার ॥৭॥

45.8

বিশ্বে অস্যা ব্যুষি মাহিনায়াঃ সং যদ্ গোভিরঙ্গিরসো নবন্ত ।
উত্স আসাং পরমে সধস্থ ঋতস্য পথা সরমা বিদদ্ গাঃ ॥৮॥

45.9

আ সূর্যো যাতু সপ্তাশ্বঃ ক্ষেত্রং যদস্যোর্বিয়া দীর্ঘয়াথে ।
রঘুঃ শ্যেনঃ পতয়দন্ধো অচ্ছা যুবা কবির্দীদয়দ্ গোষু গচ্ছন্ ॥৯॥

45.10

আ সূর্যো অরুহচ্ছুক্রমর্ণোঽয়ুক্ত যদ্ধরিতো বীতপৃষ্ঠাঃ ।
উদ্না ন নাবমনয়ন্ত ধীরা আশৃণ্বতীরাপো অর্বাগতিষ্ঠন্ ॥১০॥

45.11

ধিয়ং বো অপ্সু দধিষে স্বর্ষাং যয়াতরন্ দশ মাসো নবগ্বাঃ ।
অয়া ধিয়া স্যাম দেবগোপা অয়া ধিয়া তুতুর্যামাত্যংহঃ ॥১১॥