সূক্ত 42

42.1

১৮ ভৌমোঽত্রিঃ। বিশ্বে দেবাঃ, ১১ রুদ্রঃ। ত্রিষ্টুপ্, ১৭ একপদা বিরাট্।

প্র শংতমা বরুণং দীধিতী গীর্মিত্রং ভগমদিতিং নূনমশ্যাঃ ।
পৃষদ্যোনিঃ পঞ্চহোতা শৃণোত্বতূর্তপন্থা অসুরো ময়োভুঃ ॥১॥

42.2

প্রতি মে স্তোমমদিতির্জগৃভ্যাৎ সূনুং ন মাতা হৃদ্যং সুশেবম্ ।
ব্রহ্ম প্রিয়ং দেবহিতং যদস্ত্যহং মিত্রে বরুণে যন্ময়োভু ॥২॥

42.3

উদীরয় কবিতমং কবীনামুনত্তৈনমভি মধ্বা ঘৃতেন ।
স নো বসূনি প্রয়তা হিতানি চন্দ্রাণি দেবঃ সবিতা সুবাতি ॥৩॥

42.4

সমিন্দ্র ণো মনসা নেষি গোভিঃ সং সূরিভির্হরিবঃ সং স্বস্তি ।
সং ব্রহ্মণা দেবহিতং যদস্তি সং দেবানাং সুমত্যা যজ্ঞিয়ানাম্ ॥৪॥

42.5

দেবো ভগঃ সবিতা রায়ো অংশ ইন্দ্রো বৃত্রস্য সংজিতো ধনানাম্ ।
ঋভুক্ষা বাজ উত বা পুরংধিরবন্তু নো অমৃতাসস্তুরাসঃ ॥৫॥

42.6

মরুত্বতো অপ্রতীতস্য জিষ্ণোরজূর্যতঃ প্র ব্রবামা কৃতানি ।
ন তে পূর্বে মঘবন্ নাপরাসো ন বীর্যং১ নূতনঃ কশ্চনাপ ॥৬॥

42.7

উপ স্তুহি প্রথমং রত্নধেয়ং বৃহস্পতিং সনিতারং ধনানাম্ ।
যঃ শংসতে স্তুবতে শম্ভবিষ্ঠঃ পুরূবসুরাগমজ্জোহুবানম্ ॥৭॥

42.8

তবোতিভিঃ সচমানা অরিষ্টা বৃহস্পতে মঘবানঃ সুবীরাঃ ।
যে অশ্বদা উত বা সন্তি গোদা যে বস্ত্রদাঃ সুভগাস্তেষু রায়ঃ ॥৮॥

42.9

বিসর্মাণং কৃণুহি বিত্তমেষাং যে ভুঞ্জতে অপৃণন্তো ন উক্থৈঃ ।
অপব্রতান্ প্রসবে বাবৃধানান্ ব্রহ্মদ্বিষঃ সূর্যাদ্ যাবয়স্ব ॥৯॥

42.10

য ওহতে রক্ষসো দেববীতাবচক্রেভিস্তং মরুতো নি যাত ।
যো বঃ শমীং শশমানস্য নিন্দাত্তুচ্ছ্যান্ কামান্ করতে সিষ্বিদানঃ ॥১০॥

42.11

তমু ষ্টুহি যঃ স্বিষুঃ সুধন্বা যো বিশ্বস্য ক্ষয়তি ভেষজস্য ।
যক্ষ্বা মহে সৌমনসায় রুদ্রং নমোভির্দেবমসুরং দুবস্য ॥১১॥

42.12

দমূনসো অপসো যে সুহস্তা বৃষ্ণঃ পত্নীর্নদ্যো বিভ্বতষ্টাঃ ।
সরস্বতী বৃহদ্দিবোত রাকা দশস্যন্তীর্বরিবস্যন্তু শুভ্রাঃ ॥১২॥

42.13

প্র সূ মহে সুশরণায় মেধাং গিরং ভরে নব্যসীং জায়মানাম্ ।
য আহনা দুহিতুর্বক্ষণাসু রূপা মিনানো অকৃণোদিদং নঃ ॥১৩॥

42.14

প্র সুষ্টুতিঃ স্তনয়ন্তং রুবন্তমিলস্পতিং জরিতর্নূনমশ্যাঃ ।
যো অব্দিমাঁ উদনিমাঁ ইয়র্তি প্র বিদ্যুতা রোদসী উক্ষমাণঃ ॥১৪॥

42.15

এষ স্তোমো মারুতং শর্ধো অচ্ছা রুদ্রস্য সূনূঁর্যুবন্যূঁরুদশ্যাঃ ।
কামো রায়ে হবতে মা স্বস্ত্যুপ স্তুহি পৃষদশ্বাঁ অয়াসঃ ॥১৫॥

42.16

প্রৈষ স্তোমঃ পৃথিবীমন্তরিক্ষং বনস্পতীঁরোষধী রায়ে অশ্যাঃ ।
দেবোদেবঃ সুহবো ভূতু মহ্যং মা নো মাতা পৃথিবী দুর্মতৌ ধাৎ ॥১৬॥

42.17

উরৌ দেবা অনিবাধে স্যাম ॥১৭॥

42.18

সমশ্বিনোরবসা নূতনেন ময়োভুবা সুপ্রণীতী গমেম ।
আ নো রয়িং বহতমোত বীরানা বিশ্বান্যমৃতা সৌভগানি ॥১৮॥